Fransada 2026-cı ilin anomal isti yayının iqtisadi zərərinin təxminən €16 milyard olduğu açıqlanıb. Bu barədə Fransanın parlament komissiyasının ilkin qiymətləndirməsinə istinadən “Le Monde” məlumat yayıb.

Məlumata görə, hesablamanı “Tabe olmayan Fransa” (“La France insoumise”) partiyasından olan deputat Erik Kokrel açıqlayıb. Yeni qiymətləndirmə avqustun ortalarında ekoloji keçid naziri Monik Barbyunun açıqladığı €10-15 milyardlıq birbaşa və dolayı xərc proqnozunu üstələyir.

Deputat hesablamaların metodoloji məhdudiyyətlərinin olduğunu da qeyd edib. Belə ki, müxtəlif xarakterli xərclər eyni məbləğdə cəmlənib və bəzi xərclərin qismən iki dəfə nəzərə alınması ehtimalı var.

İsti havadan ən böyük zərər kənd təsərrüfatına dəyib. Kənd təsərrüfatı həmkarlar ittifaqlarının hesablamalarına görə, sahə üzrə ümumi itkilər təxminən €10 milyard təşkil edib. Dövlət subsidiyaları nəzərə alındıqdan sonra fermerlərin xalis zərəri €8,7 milyard səviyyəsində qiymətləndirilib.

Fransanın Maliyyə Nazirliyinin hesablamalarına əsasən, anomal istilər ölkənin iqtisadi artımını 0,1 faiz bəndi azaldıb. Bu, təxminən €3 milyard iqtisadi itki deməkdir.

Bundan əlavə, dövlət büdcəsi üçün gözlənilməz xərclər ən azı €2,5 milyard olub. Bu məbləğə fermerlərə €1,3 milyard yardım, səhiyyə sahəsinə təxminən €700 milyon və meşə yanğınları ilə bağlı ən azı €300 milyon xərc daxildir.

Səhiyyə xərcləri hesablanarkən 2003-cü ildə baş vermiş analoji isti hava dalğasının statistik göstəricilərindən istifadə edilib. Hesablamalara görə, tibbi sığorta sisteminin əlavə xərcləri təxminən €200 milyon, xəstəxanaların xərcləri €100 milyon, qocalar evləri və tibbi-sosial müəssisələrin əlavə xərcləri isə €260-520 milyon arasında olub.

İsti hava dalğasının yükü ev təsərrüfatlarının da xərclərini artırıb. Yanğınlarla bağlı sığorta ödənişləri ən azı €500 milyon, ventilyator və kondisionerlərdən istifadənin artması nəticəsində elektrik enerjisi ödənişlərindəki əlavə xərc isə €800 milyonadək qiymətləndirilib.

Beləliklə, 2026-cı ilin anomal isti yayı Fransada kənd təsərrüfatından tutmuş səhiyyə, dövlət maliyyəsi və ev təsərrüfatlarınadək bir çox sahəyə ciddi iqtisadi yük yaradıb.