ABŞ-ın Minerva Humanoids startapı partlayıcı maddələr və digər təhlükəli avadanlıqlarla işləyən mütəxəssislərin uzaq məsafədən təhlükəsiz fəaliyyət göstərməsinə imkan verən humanoid robot hazırlayıb.

“Roger” adlı robotun ilkin konsepsiyadan işlək prototipə qədər hazırlanmasının cəmi beş ay çəkdiyi bildirilir.

Robot insan tərəfindən uzaqdan idarə olunur, eyni zamanda bir sıra funksiyaları özü yerinə yetirir. Bunlara tarazlığın qorunması, naviqasiya və yıxıldıqdan sonra özünü bərpa etmə daxildir. Operator virtual reallıq dəbilqəsindən istifadə edir və robotun kameraları vasitəsilə ətrafı görərək onun hərəkətlərini idarə edir. Sistem hər iki əldən istifadə tələb edən mürəkkəb əməliyyatlar üçün də nəzərdə tutulub.

Minerva tam avtonom robot yaratmaq əvəzinə, insanın idarəetmədə qalmasına üstünlük verir. Mütəxəssis bütün əsas qərarları özü qəbul edir və robotun hərəkətlərinə birbaşa nəzarət edir, lakin təhlükəli zonadan kənarda qalır. Şirkətin məlumatına görə, idarəetmə sistemində gecikmə çox aşağıdır və operatorun hərəkətləri robota demək olar ki, real vaxt rejimində ötürülür.

Şirkət hesab edir ki, bu yanaşma istehkamçıların istifadə etdiyi mövcud uzaqdan idarə olunan sistemlərin bəzi məhdudiyyətlərini aradan qaldıra bilər. Tırtıllı robotlar və manipulyatorlar artıq partlayıcı maddələrlə məsafədən işləməyə imkan versə də, iki əllə və daha mürəkkəb hərəkətlərlə yerinə yetirilən əməliyyatlarda bəzən mütəxəssisin təhlükəli obyektə yaxınlaşması tələb olunur.

“Roger”in əsas tətbiq sahələri arasında partlayıcı qurğuların zərərsizləşdirilməsi, təhlükəli maddələrlə bağlı qəzalara müdaxilə, dənizdəki neft-qaz obyektlərində və yüksək gərginlikli enerji infrastrukturlarında işlər yer alır.

Minerva bildirir ki, operator robotun bütün bədənini idarə etməyi cəmi bir neçə dəqiqə ərzində öyrənə bilər. Bununla belə, şirkət hələlik robotun yükdaşıma qabiliyyəti, bir şarjla işləmə müddəti, hərəkət sürəti və manipulyasiya dəqiqliyi barədə məlumat açıqlamayıb.

Minerva Humanoids gizli inkişaf mərhələsindən təxminən 10 milyon dollarlıq investisiya ilə çıxıb. İnvestisiya raunduna General Catalyst rəhbərlik edib, Long Journey Ventures və Credo Ventures də maliyyələşdirmədə iştirak edib. Şirkət vəsaiti robotun inkişafının davam etdirilməsinə və ilk ödənişli pilot layihələrə hazırlığa yönəltməyi planlaşdırır. Bu layihələrin payızda başlaması gözlənilir.

Şirkət 2025-ci ilin sonunda Sandor Felber və Maurice Rame tərəfindən yaradılıb. Felber daha əvvəl MIT-də humanoid robototexnika üzrə tədqiqatlar aparıb və Tesla-nın Optimus layihəsində çalışıb. Maurice Rame isə altı il Boston Dynamics-də işləyib və şirkətin Stretch anbar robotunun hazırlanmasına texniki rəhbərlik edib.

“Roger”in ilk prototipləri Almaniyada hazırlanır və yığılır. Proqram təminatının əsas hissəsi isə ABŞ-da işlənib hazırlanır.

Robot ictimaiyyətə təqdim edilməzdən əvvəl Slovakiyada NATO-nun partlayıcı sursatların zərərsizləşdirilməsi üzrə Mükəmməllik Mərkəzində nümayiş etdirilib. Şirkət həmçinin iki böyük hava limanından birində ictimai təhlükəsizlik xidmətləri üçün sınaqlar keçirib. Robotun gələcəkdə hava limanlarında istifadəsi də nəzərdən keçirilir.

Minerva araşdırmalarını Mohamed bin Zayed Süni İntellekt Universiteti və Waterloo Universiteti ilə birgə davam etdirir. Tədqiqatçılar humanoid robotların enerji sektorunda tətbiq imkanlarını, həmçinin onların tüstü və qaranlıq şəraitində istiqamət tapmasını və sensorların sıradan çıxması zamanı fəaliyyətini araşdırırlar.