Britaniyada keçmiş şahzadə Endryu ilə bağlı istintaqda yeni hüquqi problem yaranıb.

Temza Vadisi Polisi keçmiş şahzadə Endryu Mauntbetten-Vindzorun Norfolk və Berkşirdəki evlərində aparılan axtarışlar üçün verilmiş orderlərin qanunsuz olduğunu etiraf edib.
Məsələ Böyük Britaniyanın Ali Məhkəməsində keçirilən iclas zamanı açıqlanıb.

Polisin bildirdiyinə görə, məhkəmənin axtarış orderlərinin müəyyən qanun maddəsinə əsasən verilməsi ilə bağlı ilkin qərarı səhv olub. Sözügedən axtarışlar fevralın 19-da, Endryunun vəzifə səlahiyyətlərindən sui-istifadədə şübhəli bilinərək saxlanılmasından sonra həyata keçirilib.
Hüquqi mübahisənin ardından müəyyən edilib ki, orderlər 1984-cü il tarixli Polis və Cinayət Sübutları Aktının 8-ci deyil, 9-cu maddəsinə uyğun rəsmiləşdirilməli imiş.

Temza Vadisi Polisi orderlərin hüquqi əsasının səhv seçildiyini qəbul edib və onların ləğv edilməli olduğunu bildirib.
Bununla belə, polis vurğulayıb ki, orderlərin qanunsuz sayılması istintaqın dayandırılması demək deyil. Axtarış zamanı götürülmüş sənədlər və elektron cihazlar hələ də polisin əlindədir.
Endryunun vəkilləri isə hüquq-mühafizə orqanlarının hərəkətlərinin qanuniliyinə etiraz edir və götürülmüş materialların gələcək taleyinin müəyyənləşdirilməsini tələb edirlər.

İstintaq Endryunun 2010-cu ildə, Britaniyanın ticarət nümayəndəsi olduğu dövrdə, cinsi cinayətlərə görə məhkum edilmiş Ceffri Epşteynə məxfi məlumat ötürməsi ilə bağlı şübhələr üzərində qurulub.
Endryu Epşteynlə bağlı hər hansı hüquq pozuntusunu dəfələrlə rədd edib.

Polis isə təxminən 60 yaşlarında olan Norfolk sakininin vəzifə səlahiyyətlərindən sui-istifadə etməsi ilə bağlı araşdırmanın davam etdiyini açıqlayıb. Hüquq-mühafizə orqanları həmçinin götürülmüş materialları gələcək istintaq üçün qanuni şəkildə saxlaya bilib-bilməyəcəkləri ilə bağlı məhkəməyə müraciət etməyə hazırlaşırlar.