Amerikalı diplomatlara hava limanlarından istifadə üçün xüsusi icazə tələb olunur

ABŞ Səudiyyə Ərəbistanında çalışan diplomatları üçün hava limanlarından istifadə ilə bağlı əlavə təhlükəsizlik məhdudiyyətləri tətbiq edib.

ABŞ-nin Ər-Riyaddakı səfirliyinin yaydığı məlumata görə, qərar husilərin Səudiyyə Ərəbistanına hücumları fonunda qəbul edilib.

Bundan sonra amerikalı dövlət qulluqçuları Dammam və Ciddə şəhərlərinin hava limanlarından istifadə etmək üçün xüsusi icazə almalıdırlar. ABŞ vətəndaşlarına isə uçuşlardan çəkinmək, avtomobil və ya qatarla hərəkət etmək tövsiyə edilib.

Dövlət Departamenti daha əvvəl Ər-Riyadda yerləşən Kral Xalid adına Beynəlxalq Hava Limanından istifadə ilə bağlı da oxşar məhdudiyyət tətbiq etmişdi.

Məlumata görə, son bir həftə ərzində husilərin Səudiyyə Ərəbistanında beş hava limanına hücumları 19 nəfərin ölümü və yüzlərlə insanın yaralanması ilə nəticələnib.