Britaniyalı Karl Buşbi motorlu nəqliyyat vasitələrindən istifadə etmədən həyata keçirdiyi dünya səyahətini təxminən 28 ildən sonra başa vuraraq vətəninə qayıdıb.

57 yaşlı, keçmiş britaniyalı paraşütçü hərbçi uzun illər davam edən və “Qoliaf ekspedisiyası” adlanan səyahətini tamamlayıb.

Buşbi 1998-ci il noyabrın 1-də Çilinin Punta-Arenas şəhərindən yola çıxarkən qarşısına iki əsas şərt qoyub. O, marşrut boyunca irəliləmək üçün motorlu nəqliyyat vasitələrindən istifadə etməməli və səyahət başa çatana qədər İngiltərənin Hull şəhəri yaxınlığındakı evinə qayıtmamalı idi.

Səyyah bu müddət ərzində təxminən 31 min mil (50 min kilometr) məsafə qət edib və 29 ölkəyə səfər edib.

İlkin hesablamalara görə, səyahətin təxminən 12 il davam edəcəyi gözlənilirdi. Lakin viza məhdudiyyətləri, 2008-ci il maliyyə böhranı zamanı sponsor dəstəyinin itirilməsi, COVID-19 pandemiyası və geosiyasi gərginliklər planlaşdırılan müddətin dəfələrlə uzanmasına səbəb olub.

Bütün çətinliklərə baxmayaraq, Karl Buşbi onilliklər ərzində davam etdirdiyi ekspedisiyanı sona çatdıraraq qarşısına qoyduğu məqsədə nail olub. Onun səyahəti uzunmüddətli dözümlülük və qeyri-adi macəra nümunəsi kimi diqqət çəkir.