İranın cənub-şərqində İslam İnqilabı Keşikçiləri Korpusunun (SEPAH) qüvvələri ilə terrorçu qrupun üzvləri arasında baş verən silahlı toqquşma nəticəsində beş nəfər öldürülüb. Girov götürülən mühəndis azad edilib, bir hərbçi isə həlak olub.
Mehr agentliyinin məlumatına görə, əməliyyat Sistan və Bəlucistan əyalətinin Zahedan şəhərinin Kou­rin bölgəsində keçirilib.

SEPAH-ın Quru Qoşunlarının mətbuat xidmətinin yaydığı məlumata əsasən, bir gün əvvəl naməlum qrup Zahedanın qərb hissəsində tikinti sahəsində çalışan mühəndisi qaçırıb.

Qrupun onu qonşu ölkəyə aparmağı planlaşdırdığı bildirilir.
Hadisədən sonra SEPAH-ın Quru Qoşunlarının “Qüds” bölməsinin hərbçiləri qaçırılan şəxsin və ehtimal olunan cinayətkarların yerini müəyyənləşdirmək üçün kəşfiyyat imkanlarından istifadə ediblər.

Qrupun Kou­rin bölgəsində gizləndiyi barədə məlumat əldə edildikdən sonra təhlükəsizlik qüvvələri qəfil əməliyyat keçiriblər.