“Airbus” və “Kratos Defense & Security Solutions” şirkətləri ABŞ istehsalı olan XQ-58A Valkyrie pilotsuz döyüş təyyarəsinin Avropa versiyası — U740 Valkyrie aparatının ilk sınaq uçuşunu həyata keçiriblər.

Sınaq Almaniyanın 2029-cu ilə qədər döyüşə hazır pilotsuz aviasiya kompleksi əldə etmək planının reallaşdırılması istiqamətində növbəti addım hesab olunur. Almaniya Hərbi Hava Qüvvələri yeni nəsil reaktiv döyüş dronlarının alınmasına hazırlaşır. Bu aparatların istifadəsi ölkənin pilotsuz aviasiya imkanlarını əhəmiyyətli dərəcədə genişləndirə bilər.

“Airbus” şirkətinin məlumatına görə, sınaq uçuşu Şimali Avropada yerləşən, adı açıqlanmayan poliqonda baş tutub. U740 raket sürətləndiricisinin köməyi ilə havaya qalxıb, müxtəlif yüksəkliklərdə manevrlər edib və saatda 960 kilometrədək sürətə çatıb. Sınaq zamanı uçuşun gedişində tapşırığın dəyişdirilməsi imkanları da yoxlanılıb. Şirkət bütün sınaq məqsədlərinə nail olunduğunu bildirib.

Növbəti mərhələdə “Airbus” tərəfindən hazırlanmış MARS (Multi-platform Autonomous Reconfigurable and Secure) missiya idarəetmə sisteminin pilotsuz təyyarəyə inteqrasiyası planlaşdırılır. Bu barədə Naked Science nəşri məlumat yayıb.

MARS sistemi proqram təminatı və döyüş tapşırıqlarının idarə olunması arxitekturası üzərində Avropanın nəzarətini təmin etməlidir. Tərtibatçıların planına əsasən, sistem dronlara avtonom fəaliyyət göstərməyə, qrup şəklində koordinasiyalı işləməyə və eyni zamanda ən mühüm qərarların qəbulunda insan nəzarətini saxlamağa imkan verəcək.

U740 layihəsinin əsasını “Kratos” şirkətinin hazırladığı ABŞ istehsalı XQ-58A Valkyrie pilotsuz təyyarəsi təşkil edir. Nisbətən aşağı xərcli döyüş platforması kimi hazırlanmış bu aparat “Airbus” tərəfindən özünün MARS idarəetmə sisteminin inteqrasiyası yolu ilə Avropa tələblərinə uyğunlaşdırılır.

Bu yanaşma Almaniyaya tamamilə yeni təyyarə konstruksiyasının hazırlanmasını gözləmədən Avropanın nəzarətində olan pilotsuz döyüş kompleksi əldə etmək imkanı yarada bilər.

U740-ün əsas xüsusiyyətlərindən biri raket sürətləndiricisi vasitəsilə havaya qalxmasıdır. Bu imkan aparatın ənənəvi uçuş-enmə zolaqlarından asılılığını azaldır.

Valkyrie platformasının ilkin versiyasında yerə əsasən paraşüt vasitəsilə qayıdış nəzərdə tutulsa da, sonrakı variantlarda raket sürətləndiricisi ilə havaya qalxmaq və uçuş-enmə zolağına enmək imkanları da inkişaf etdirilib. Bu xüsusiyyətlər aparatın tətbiq imkanlarını genişləndirir və onun yerləşdirilməsi üçün daha çox alternativ yaradır.

Almaniya Hərbi Hava Qüvvələri üçün belə bir sistem aviasiya vasitələrinin müxtəlif ərazilərdə yerləşdirilməsi baxımından əhəmiyyətli ola bilər. Eyni zamanda, tam təchiz olunmuş aerodromların olmadığı və ya mövcud infrastrukturun hücum təhlükəsi ilə üzləşdiyi ərazilərdən pilotsuz təyyarələrin buraxılmasına imkan yarada bilər.