İran ABŞ-a məxsus hərbi gəmiləri ölkə sahillərindən daha da uzaqlaşdırmağa hesablanmış yeni əməliyyat planları hazırlayır. Bu barədə İran ordusunun nümayəndəsi, briqada generalı Məhəmməd Əkrəminiya açıqlama verib. Məlumatı “Mehr” agentliyi yayıb.

Generalın sözlərinə görə, ABŞ Prezidenti Donald Trampın dəfələrlə səsləndirdiyi bəyanatlara baxmayaraq, İranın hava hücumundan müdafiə sistemlərinin hazırkı imkanları müharibədən əvvəlki və döyüş əməliyyatları zamanı qeydə alınan göstəricilərdən xeyli yüksəkdir.

Əkrəminiya bildirib ki, son həftələrdə İranın hava hücumundan müdafiə bölmələri ölkənin hava məkanında bir neçə ABŞ pilotsuz uçuş aparatını vurub. Onun iddiasına görə, ABŞ hərbi gəmiləri Fars körfəzi sahillərindən 500 kilometrdən çox məsafəyə çəkilməyə məcbur olublar.

General İran hərbçilərinin qabaqcıl, kompleks və innovativ əməliyyatları uğurla həyata keçirdiklərini də qeyd edib.

O, ölkənin milli hava hücumundan müdafiə sisteminin müharibədən əvvəlki dövrlə müqayisədə əhəmiyyətli dərəcədə gücləndiyini vurğulayıb.

“Hazırda Hörmüz boğazının şərqində müşahidə olunan qeyri-sabitlik ABŞ-ın dağıdıcı mövcudluğunun birbaşa nəticəsidir”, – deyə Əkrəminiya bildirib.

General əlavə edib ki, region ölkələri və beynəlxalq ictimaiyyət ABŞ-ı bölgədəki qeyri-sabitliyin əsas səbəbi kimi tanımalıdır.

Qeyd edək ki, İran tərəfinin ABŞ hərbi gəmilərinin mövqeyi və hava hücumundan müdafiə sistemlərinin imkanları ilə bağlı səsləndirdiyi iddialar müstəqil mənbələr tərəfindən təsdiqlənməyib.