İran İslam İnqilabı Keşikçiləri Korpusunun (SEPAH) rəsmi nümayəndəsi, general Hüseyn Məhəbbi bildirib ki, Tehran siyasi və hərbi kursunu ardıcıl şəkildə davam etdirir və üzərinə götürdüyü öhdəlikləri yerinə yetirir. Onun sözlərinə görə, bu baxımdan İran ABŞ rəhbərliyindən fərqlənir.

IRNA agentliyinin məlumatına görə, Məhəbbi bu fikirləri Tehranda Müqəddəs Müdafiə Muzeyində yeni nəşrlərin təqdimatı zamanı səsləndirib.
Generalın iddiasına görə, qarşı tərəf qısa müddətdə İranda dövlət quruluşunu dəyişdirməyi və ölkəni kiçik ərazilərə parçalamağı hədəfləyib. Lakin İran xalqının genişmiqyaslı müqaviməti ilə üzləşib.

Məhəbbi bildirib ki, İran xalqının müqavimət əzmini gördükdən sonra qarşı tərəf ilkin məqsədlərindən tədricən geri çəkilməyə məcbur olub və tələblərini Hörmüz boğazının blokadadan çıxarılması ilə məhdudlaşdırıb. Onun sözlərinə görə, bu məqsədə də nail olmaq mümkün olmayıb.