İordaniyada əməliyyat zamanı 3 silahlı yaralanıb

İordaniyada Karak vilayətindəki pravoslav kilsəsinə hücum etməkdə şübhəli bilinən üç nəfər saxlanılıb.

Bu barədə İordaniyanın Daxili İşlər Nazirliyi məlumat yayıb. Nazirliyin açıqlamasına görə, oktyabrın 26-da səhər saatlarında keçirilən əməliyyat zamanı şübhəlilərin yeri müəyyən edilib.

Onlar Əl-Kərək şəhərinin kənarında yerləşən tərk edilmiş evdə aşkarlanıblar. Silahlı şəxslər təslim olmaqdan imtina edərək hüquq-mühafizə orqanlarının əməkdaşlarına atəş açıblar. Qarşıdurma zamanı üç şübhəlinin hamısı yaralanıb və saxlanılıb.

Xatırladaq ki, oktyabrın 23-də Karak bölgəsindəki kilsədə dəfn mərasimi zamanı insanlara atəş açılıb. Hadisə nəticəsində 9 nəfər həlak olub, 40 nəfər yaralanıb.