Banqladeşin paytaxtı Dəkkə şəhərinin ətrafında yerləşən ən azı 264 tikiş fabriki işçilərlə polis arasında baş verən toqquşmalar səbəbindən fəaliyyətini dayandırıb. Etirazlar minimum əməkhaqqının artırılması və digər əmək hüquqları ilə bağlı tələblər fonunda başlayıb.

“Dhaka Tribune” qəzetinin məlumatına görə, sənaye müəssisələrinin yerləşdiyi Savar-Aşuliya bölgəsində 264 tikiş fabrikində iş günü elan edilməyib. Hadisələrin qarşısını almaq və təhlükəsizliyi təmin etmək məqsədilə əraziyə əlavə polis qüvvələri cəlb olunub.

Artıq üçüncü gündür ki, Savar və Aşuliya sənaye zonalarında tikiş fabriklərinin işçiləri etiraz aksiyaları keçirirlər. Onlar minimum əməkhaqqının 30 min takaya (təxminən 240 dollar) çatdırılmasını, işçilərin qara siyahıya salınması praktikasına son qoyulmasını və kütləvi işdən çıxarılmaların dayandırılmasını tələb edirlər.

Noyabrın 2-də səhər saatlarında işçilər əməkhaqqının artırılması və digər tələblərinin yerinə yetirilməsi məqsədilə yolu bağlayıblar. Daha sonra polis danışıqlar apararaq yolu nəqliyyatın hərəkəti üçün açmağa nail olub. Newage Garments fabrikində isə işçilər istehsalat sahəsinə daxil olaraq işi dayandırıblar.

Digər etirazçılar yolda oturaq aksiya keçiriblər. Polis onları dağıtmağa çalışarkən qarşıdurma yaranıb. Etirazçılar hüquq-mühafizə orqanlarının əməkdaşlarına daş və kərpic parçaları atıblar. Buna cavab olaraq polis gözyaşardıcı qazdan istifadə edib.

İğtişaşlar zamanı qəzəbli işçilər Narsinqhpur rayonunda furqonlardan birini yandırıblar. Bu hadisə sənaye zonasındakı vəziyyəti daha da gərginləşdirib.

Sonradan polis vəziyyəti nəzarətə götürmək üçün işçilərlə danışıqlara başlayıb. Hadisələr nəticəsində tikiş sənayesində çalışan iki nəfər saxlanılıb.