İran Prezidenti Məsud Pezeşkian ABŞ və İsrailin müharibə zamanı İrana vurduğu ekoloji ziyana görə məsuliyyətə cəlb olunmasına çağırıb.

Pezeşkian bu barədə Türkiyənin Antalya şəhərində keçirilən BMT-nin İqlim Dəyişikliyi üzrə 31-ci Konfransı (COP31) çərçivəsində dövlət və hökumət başçılarının sammitində çıxışı zamanı bildirib. Bu barədə “Mehr” agentliyi məlumat yayıb.

İran prezidenti beynəlxalq ictimaiyyətin ətraf mühitin qorunması, ümumi məsuliyyət və iqlim ədaləti məsələlərinə yanaşmasını yenidən nəzərdən keçirməsinin vacibliyini vurğulayıb. O, sülh və ekoloji təhlükəsizliyin bir-biri ilə sıx bağlı olduğunu qeyd edib.

Pezeşkianın sözlərinə görə, torpağa, suya, havaya və təbii sərvətlərə təsir edən müharibələr uzun illər, hətta nəsillər boyu davam edən ekoloji fəsadlara səbəb olur.

ABŞ və İsrailin İrana qarşı son hücumlarından danışan prezident bildirib ki, bu əməliyyatlar ciddi insan tələfatı və iqtisadi itkilərlə yanaşı, ətraf mühitə də böyük ziyan vurub.

Onun təqdim etdiyi rəqəmlərə əsasən, Əsəluye bölgəsində yanacaq obyektlərinə endirilən zərbələr nəticəsində atmosferə təxminən 500 min ton çirkləndirici maddə yayılıb. Tehran ətrafındakı neft anbarlarının vurulması isə təqribən 1 milyon ton karbon qazı emissiyasına səbəb olub.

Pezeşkian hərbi əməliyyatların ekoloji nəticələrinin istixana qazı emissiyalarının azaldılması istiqamətində qlobal səylərlə ziddiyyət təşkil etdiyini bildirib. Onun fikrincə, yanacaq sərfiyyatı, partlayışlar, infrastrukturun dağıdılması və genişmiqyaslı yanğınlar ətraf mühitin qorunması üçün uzun illər ərzində görülən işləri heçə endirə bilər.

İran prezidenti qorunan təbiət ərazilərinə və ekoloji müfəttişlərin nəzarət məntəqələrinə endirilən zərbələrə də diqqət çəkib. O vurğulayıb ki, bu ərazilər bəşəriyyətin ümumi sərvətidir və gələcək nəsillər üçün qorunmalıdır.

Pezeşkian ekoloji zərərin qeydə alınması, qarşısının alınması və təqsirkarların məsuliyyətə cəlb edilməsi üçün daha effektiv beynəlxalq mexanizmlərin yaradılmasını təklif edib. O, həmçinin dövlətlərin sülh dövründəki iqlim öhdəlikləri ilə silahlı münaqişələr zamanı ekoloji məsuliyyəti arasında əlaqənin gücləndirilməsinin və hərbi təcavüz nəticəsində yaranan ekoloji itkilərə görə kompensasiya mexanizmlərinin təkmilləşdirilməsinin vacibliyini qeyd edib.

İranın enerji siyasətinə toxunan Pezeşkian sanksiyalara və beynəlxalq maliyyələşmə, texnologiyalara çıxış məhdudiyyətlərinə baxmayaraq, ölkənin bərpaolunan enerji sahəsini inkişaf etdirməyə davam etdiyini bildirib.

Onun sözlərinə görə, son iki ildə İranda bərpaolunan enerji mənbələrinin quraşdırılmış gücü təxminən 1 250 meqavatdan 6 150 meqavata yüksəlib. Cari ildə isə təmiz enerji mənbələrindən elektrik enerjisi istehsalı 4,5 milyard kilovat-saatı ötüb. Bunun nəticəsində atmosferə təxminən 2,5 milyon ton karbon qazının atılmasının qarşısı alınıb.

“Yer kürəsi heç bir ölkəyə və ya nəslə məxsus deyil. O, bizə etibar edilmiş ümumi sərvətdir və gələcək nəsillərə qorunmuş vəziyyətdə təhvil verilməlidir”, – deyə Pezeşkian bildirib.

İran prezidenti çıxışının sonunda sülhün ətraf mühitin qorunması, ekoloji təhlükəsizliyin isə davamlı sülh üçün zəruri şərt olduğunu vurğulayıb. O, İranın ədalətli və məsuliyyətli beynəlxalq əməkdaşlığa hazır olduğunu da bəyan edib.