Tramp Kubaya qarşı hərbi müdaxilə ehtimalını istisna etməyib: “Bu məsələni vəzifəmdən getməzdən əvvəl həll etmək istəyirəm”
ABŞ Prezidenti Donald Tramp Kuba ilə bağlı məsələni prezidentlik müddəti başa çatana qədər həll etmək niyyətində olduğunu bildirib. O, ada dövlətinə qarşı hərbi güc tətbiqi ehtimalını da istisna etməyib.

Tramp bu barədə noyabrın 12-də Salem News Channel telekanalına müsahibəsində danışıb.

“Vəzifəmdən getməzdən əvvəl Kuba məsələsini həll etmək istəyirəm. Bizim bu işlə məşğul ola biləcək çox yaxşı və istedadlı bir adamımız var. Onun adı Markodur”, – deyə ABŞ Prezidenti bildirib.

O, dövlət katibi Marko Rubionu nəzərdə tutduğunu açıqlayıb. Qeyd edək ki, Rubionun valideynləri Kubadan mühacirət ediblər.

Trampın sözlərinə görə, Rubio Kuba məsələsi ilə məşğul olmaqda maraqlıdır və Vaşinqton adada baş verənləri diqqətlə izləyir.

Müsahibə zamanı aparıcı ABŞ Prezidentindən Kuba məsələsinin həlli üçün hərbi güc tətbiqi zəruri olarsa, belə bir əməliyyata göstəriş verib-verməyəcəyini soruşub.

Tramp suala cavabında hərbi müdaxilə ehtimalını nəzərdən keçirəcəyini bildirib: “Bəli, mən bunu qəti şəkildə nəzərdən keçirərdim”.

ABŞ Prezidenti daha əvvəl də Kubaya müdaxilə ehtimalından danışıb. Oktyabr ayında o, İrana qarşı əməliyyatdan qayıdan ABŞ hərbi gəmilərinin Kuba sahilləri yaxınlığından keçə biləcəyini, daha sonra isə Marko Rubionun razılaşma əldə etmək üçün adaya gedə biləcəyini bildirmişdi.

Bununla yanaşı, Tramp sentyabr ayında Vaşinqton və Havanın hərbi güc tətbiq edilmədən razılığa gələ biləcəyinə ümid etdiyini söyləmişdi.

Son dövrlərdə Tramp administrasiyası Kuba hakimiyyətinə qarşı təzyiqləri artıraraq adada siyasi dəyişikliklərə nail olmağa çalışır.

Kuba hazırda ciddi iqtisadi və enerji böhranı ilə üzləşib. Ölkədə yanacaq çatışmazlığı, elektrik enerjisinin verilməsində fasilələr və qiymət artımı əhalinin gündəlik həyatına ciddi təsir göstərir.

Bununla belə, Trampın son açıqlaması Kubaya qarşı konkret hərbi əməliyyat qərarının verildiyi anlamına gəlmir. ABŞ Prezidenti yalnız belə bir variantı nəzərdən keçirə biləcəyini bildirib. Hər hansı əməliyyatın vaxtı, miqyası və məqsədləri barədə rəsmi plan açıqlanmayıb.