ABŞ nümayəndəsi Cared Küşner Avropa ölkələrinin Rusiya ilə keçiriləcək növbəti danışıqlar raundunda iştirak edəcəyini bildirib.

ABŞ-ın nümayəndəsi Cared Küşner İrlandiyada Ukrayna Prezidenti Volodimir Zelenski ilə görüşdən sonra jurnalistlərə qısa açıqlamasında Rusiya, Ukrayna və ABŞ arasında aparılan danışıqların növbəti mərhələsində Avropa ölkələrinin də təmsil olunacağını bəyan edib.

İndiyədək üçtərəfli formatda keçirilən danışıqlarda Avropa ölkələrinin iştirakına Moskva açıq şəkildə etiraz edirdi. Bununla belə, Küşner cümə axşamı Kremldə Rusiya Prezidenti ilə görüşün açıq hissəsində də avropalıların danışıqlar prosesinə qoşulmasının vacibliyini vurğulayıb.

ABŞ nümayəndəsi Zelenski ilə görüşdən sonra bu mövqeyini bir daha təkrarlayıb.

“Avropalılar danışıqlar masasında əyləşmədən biz bu razılaşmanı yekunlaşdıra bilmərik”, – deyə Küşner bildirib.

Onun sözlərini AFP agentliyi yayıb.

Beləliklə, növbəti danışıqlar raundunda Avropa ölkələrinin də iştirakı nəzərdə tutulur. Bu isə Ukrayna müharibəsinin nizamlanması üzrə diplomatik prosesdə iştirakçıların dairəsinin genişlənməsi deməkdir.