AzadMedia
Telegram Facebook Twitter Youtube Instagram

Şimali Makedoniyanın xüsusi xidmət orqanı İranı Yunanıstanda terror aktı hazırlamaqda ittiham edib

  • + A
  • - A
  • Bu gün, 21:56

    Şimali Makedoniyanın xüsusi xidmət orqanı İranı Yunanıstanda terror aktı hazırlamaqda ittiham edib


    Şimali Makedoniyanın xüsusi xidmət orqanı İranı Yunanıstanda terror aktı hazırlamaqda ittiham edib

    Şimali Makedoniyanın Milli Təhlükəsizlik Agentliyi İran xüsusi xidmət orqanları ilə əlaqəli şəxslər şəbəkəsini aşkar etdiyini açıqlayıb. Həmin şəxslərin Yunanıstanda terror aktı və ya sui-qəsd hazırlamaqda şübhəli bilindiyi bildirilir.

    Agentliyin bəyanatına görə, şəbəkənin üzvləri Şimali Makedoniya ərazisində fəaliyyət göstərərək ehtimal olunan hücumun həyata keçirilməsi üçün zəruri logistika infrastrukturunu hazırlayıblar.

    Qurumun məlumatında qeyd olunur ki, 2026-cı ilin əvvəlindən etibarən Yunanıstanın Milli Kəşfiyyat Xidməti və digər xarici tərəfdaşlarla əməkdaşlıq çərçivəsində araşdırmalar aparılıb. Əməliyyatlar Şimali Makedoniyanın Daxili İşlər Nazirliyinin İctimai Təhlükəsizlik Bürosu ilə koordinasiyalı şəkildə həyata keçirilib.

    Araşdırmalar nəticəsində İran vətəndaşı Edris Cahangiri Mavane ilə əlaqəli yerli şəbəkənin müəyyən edildiyi iddia olunur. Xüsusi xidmət orqanının bildirdiyinə görə, Mavane İranın kəşfiyyat və təhlükəsizlik strukturlarının maraqları naminə fəaliyyət göstərən vasitəçilər və digər şəbəkə üzvləri ilə əlaqəlidir. Onun narkobaron kimi xarakterizə edilən Naci Şərifi Zindaşti ilə də əlaqəsinin olduğu iddia edilir.

    Agentliyin versiyasına əsasən, Şimali Makedoniyada fəaliyyət göstərən və kriminal strukturlarla əlaqəli şəxslər Mavanenin birbaşa göstərişləri əsasında Yunanıstanda terror aktı və ya konkret şəxsə qarşı sui-qəsd təşkil etmək üçün hazırlıq işləri görüblər.

    Bildirilib ki, xarici xüsusi xidmət orqanları ilə əməkdaşlıq şəbəkənin fəaliyyət mexanizmini müəyyənləşdirməyə imkan verib. Şəbəkə üzvlərinin İran da daxil olmaqla üçüncü ölkələrdə məxfi görüşlər keçirdiyi, həmin görüşlər zamanı Mavane ilə əlaqələrin təsdiqləndiyi iddia olunur. Agentlik onu planlaşdırılan hücumun əsas təşkilatçısı hesab edir.

    Şimali Makedoniyanın Milli Təhlükəsizlik Agentliyi hesab edir ki, üçüncü ölkələrdə fəaliyyət göstərən kriminal vasitəçi şəbəkələrdən istifadə İranın kəşfiyyat strukturlarının terror təhdidlərində və hücumlarda iştirakını gizlətmək məqsədi daşıya bilər.

    Qurum potensial təhdidlərin qarşısının alınması, eləcə də bu cür şəbəkələrlə əlaqəli digər şəxslərin müəyyənləşdirilməsi istiqamətində fəaliyyətini davam etdirəcəyini açıqlayıb.

    Qeyd: Məlumat Şimali Makedoniyanın xüsusi xidmət orqanının iddialarına əsaslanır. İttihamların müstəqil təsdiqi barədə məlumat təqdim edilməyib.


    www.AzadMedia.az

    Mətndə səhv var? Onu siçanla seçin və Ctrl+Enter düyməsini basın.
    OXŞAR XƏBƏRLƏR

    Köşə
    XƏBƏR LENTİ
    BÜTÜN XƏBƏRLƏR