Venesuelada baş verən güclü zəlzələlərdən sonra dağıntılar altında qalan ata və yeniyetmə oğlu dörd gün sonra sağ şəkildə xilas ediliblər. Bu barədə The Guardian məlumat yayıb.

Xilasetmə əməliyyatı paytaxt Karakasdan təxminən 40 kilometr şimalda yerləşən Karabalyeda şəhərində həyata keçirilib. Axtarış-xilasetmə işlərinə Fransa və ABŞ-dan gəlmiş xüsusi xilasedici qruplar da cəlb olunub.

Xorxe Rodriges bildirib ki, zəlzələ nəticəsində ölkədə 38 xəstəxana, 44 ticarət mərkəzi və 1645 digər infrastruktur obyekti zərər görüb. Onun sözlərinə görə, dağıntıların miqyası olduqca böyükdür və bərpa işləri uzun müddət davam edəcək.

Xatırladaq ki, iyunun 24-də axşam saatlarında Venesuelada bir dəqiqədən az fasilə ilə 7,2 və 7,5 bal gücündə iki güclü zəlzələ baş verib. Bu təbii fəlakət son yüz ildən artıq dövrdə ölkədə qeydə alınan ən güclü zəlzələlərdən biri hesab olunur. Yeraltı təkanlar Karakas da daxil olmaqla bir neçə ştatda hiss edilib.

Zəlzələdən sonra ölkədə fövqəladə vəziyyət elan olunub. Daha əvvəl isə Avropa İttifaqı Venesuelaya humanitar yardım ayırdığını açıqlamışdı.

Ata və oğlunun dörd gün ərzində dağıntılar altında sağ qalaraq xilas edilməsi isə xilasedicilər tərəfindən faciə fonunda ümidverici və möcüzəvi hadisə kimi qiymətləndirilir.