Bəzi laborator analizlər illərlə tibbi praktikada geniş istifadə olunsa da, müasir diaqnostik üsulların inkişafı ilə onların əhəmiyyəti azalmaqdadır. Azadmedia.az xəbər verir ki, bu barədə Laboratoriya Təbabəti Federasiyasının innovasiya komitəsinin həmsədri, Rusiya tibbi avadanlıq və reagentlər istehsalçıları assosiasiyasının direktorlar şurasının sədri Andrey Varivoda “Gazeta.Ru”ya açıqlamasında bildirib.

Ekspertin sözlərinə görə, informativliyi zəif sayılan testlərə kreatinin, C-reaktiv zülal (CRP), eritrositlərin çökmə sürəti (ESR), homosistein və koprogramma daxildir.

Varivoda qeyd edib ki, söhbət bu testlərin tamamilə “köhnəlməsindən” yox, daha çox risklərin qiymətləndirilməsi baxımından informativlik və qənaətcilliyin optimal nisbətindən gedir. Məsələn, kreatinin böyrəklərin fəaliyyətini göstərən göstərici olsa da, sistatin-C bu funksiyanı daha dəqiq yerinə yetirir və diaqnostik səhvlərin qarşısını alır.

Ekspert CRP analizini də universal iltihab göstəricisi kimi ideal hesab etmir, çünki onun spesifikliyi kifayət qədər yüksək deyil. ESR isə yalnız keçmişdə istifadə olunan, indi isə “tarixi əhəmiyyət daşıyan” bir analizdir. Müasir genişləndirilmiş qan analizləri bu göstəricini daha düzgün əvəz edir.

Homosistein testinin də ürək-damar risklərinin qiymətləndirilməsində daha effektiv göstərici olan NT-proBNP ilə müqayisədə zəif qaldığı vurğulanır.

Koprogramma isə, Varivodanın sözlərinə görə, hələ də tibbdə mühüm rola malikdir, lakin modernləşdirilməyə ehtiyac duyur. Onun fikrincə, bu analiz kolorektal xərçəngin erkən aşkarlanmasında vacibdir, lakin müasir laboratoriyalarda nəcisin avtomatlaşdırılmış təhlili hələ geniş tətbiq olunmayıb.

Ekspert yekunda bildirib ki, qan və sidiyin ümumi analizi artıq tam avtomatlaşdırıldığı halda, koprogram hələ də yeni texnologiyaların tətbiqini gözləyir.