Yeməkdən sonra qanda şəkərin kəskin yüksəlməsi Alzheimer xəstəliyinin yaranma riskini əhəmiyyətli dərəcədə artıra bilər. Bu nəticəyə Liverpul Universitetinin alimləri Böyük Britaniyanın ən iri biotibbi tədqiqat layihələrindən biri olan UK Biobank məlumatlarını təhlil edərək gəliblər. Araşdırma Diabetes Obesity and Metabolism jurnalında dərc olunub.
Əvvəlki elmi işlərdə şəkərli diabet, hiperglikemiya və insulinə davamlılığın beyin sağlamlığına mənfi təsir göstərdiyi məlum idi. Lakin bu əlaqənin dəqiq mexanizmləri tam aydın deyildi. Yeni tədqiqatda alimlər 40–69 yaş aralığında olan 350 mindən çox insanın genetik göstəricilərini araşdırıblar.
Araşdırma zamanı aclıq şəkəri, insulin səviyyəsi və yeməkdən iki saat sonra qandakı qlükoza göstəriciləri təhlil edilib. Mendel randomizasiyası üsulu ilə bu faktorların demensiyanın, xüsusilə Alzheimer xəstəliyinin yaranmasında səbəbkar olub-olmadığı yoxlanılıb.
Nəticələr göstərib ki, yeməkdən sonra qanda şəkəri yüksək olan şəxslərdə Alzheimer xəstəliyinə tutulma riski 69 faiz daha çoxdur. Maraqlıdır ki, bu risk beynin ümumi həcminin azalması və ya ağ maddənin zədələnməsi ilə izah olunmur. Bu isə təsirin daha incə və hələ tam öyrənilməmiş mexanizmlərlə bağlı olduğunu göstərir.
Tədqiqatın aparıcı müəllifi Endryu Meyson bildirib ki, bu nəticələr gələcək profilaktik strategiyaların formalaşdırılmasına töhfə verə və qanda şəkərin yalnız ümumi səviyyəsinin deyil, məhz yeməkdən sonrakı göstəricilərin də nəzarətdə saxlanmasının vacibliyini ön plana çıxara bilər.
Azadmedia.az