Qısa müddətli görmə itkisi beyin şişinin az nəzərə çarpan əlamətlərindən biri ola bilər. Bu barədə Britaniyanın xeyriyyə təşkilatı olan Brain Tumour Charity mütəxəssisləri xəbərdarlıq edib. Məlumatı Daily Mirror yayıb.
Mütəxəssislərin sözlərinə görə, bu hal bir neçə saniyə davam edən qəfil “göz qaralması” kimi özünü göstərir və adətən öz-özünə keçir. Çox vaxt belə hallar uzanmış və ya oturmuş vəziyyətdən qəfil ayağa qalxanda baş verir və buna görə insanlar buna ciddi yanaşmır. Amma bəzi hallarda bu, beyin şişi ilə əlaqəli ola bilər.
Bu cür görmə pozuntuları şişin görmə sinirinə təzyiq etməsi və ya həmin nahiyədə şişkinlik yaranması ilə bağlı ola bilər. Görmə siniri gözlə beyin arasında siqnalları ötürən əsas hissədir və onun zədələnməsi görüntünün təhrif olunmasına səbəb ola bilər.
Digər mümkün əlamətlərə bulanıq görmə, görmə sahəsinin qismən itməsi və müxtəlif vizual dəyişikliklər daxildir.
Həkimlər qeyd edir ki, əksər hallarda qısa müddətli görmə problemləri daha sadə səbəblərlə — məsələn, təzyiq dəyişməsi və ya qan dövranı ilə bağlı olur. Bununla belə, belə hallar tez-tez təkrarlanarsa, mütləq həkimə müraciət etmək və müayinə olunmaq tövsiyə edilir.