Astronomlar kainatın ən böyük sirlərindən biri hesab olunan qaranlıq maddənin təbiətini anlamağa kömək edə biləcək mühüm kəşfə imza atıblar. Alimlər DF9 adlı, demək olar ki, qaranlıq maddədən məhrum olan yeni qalaktika aşkar ediblər.

Araşdırmaya görə, DF9 daha əvvəl aşkar edilmiş DF2 və DF4 qalaktikaları ilə eyni xətt boyunca yerləşir və onların da qaranlıq maddədən demək olar ki, məhrum olduğu müəyyən edilmişdi. Yeni tapıntı bu üç qalaktikanın eyni güclü kosmik hadisə nəticəsində yarandığı ehtimalını daha da gücləndirir.

Tədqiqatın aparıcı müəllifi Maykl Keymin sözlərinə görə, kainatdakı demək olar ki, bütün qalaktikalar qaranlıq maddənin təsiri altındadır. Lakin DF2, DF4 və indi də DF9 bu qaydanın nadir istisnalarıdır. Alimin fikrincə, bu qalaktikalar adi maddə ilə qaranlıq maddənin bir-birindən ayrıldığı son dərəcə şiddətli toqquşma nəticəsində formalaşıb.

Tədqiqatçılar hesab edirlər ki, iki qalaktikanın yüksək sürətli toqquşması zamanı qaz qaranlıq maddədən ayrılıb və nəticədə yalnız adi maddədən ibarət yeni qalaktikalar yaranıb. Belə sistem indiyədək müşahidə olunmamışdı və bu kəşf qalaktikaların yaranması haqqında mövcud təsəvvürləri dəyişə bilər.

Araşdırmanın həmmüəllifi Pieter van Dokkum bildirib ki, nəticələr qaranlıq maddənin real fiziki maddə olduğunu göstərən ən güclü sübutlardan biridir və alternativ cazibə nəzəriyyələrinə qarşı mühüm dəlil hesab olunur.

Alimlər müşahidələr zamanı Keck Cosmic Web Imager cihazından istifadə edərək DF9-dakı ulduzların hərəkətini ölçüblər. Hesablamalar göstərib ki, qalaktikanın ümumi kütləsi təxminən 100 milyon Günəş kütləsinə bərabərdir və bu göstərici tamamilə görünən maddə ilə izah olunur. Əgər DF9-da adi qalaktikalardakı qədər qaranlıq maddə olsaydı, onun kütləsi təxminən 100 dəfə böyük olmalı idi.

Tədqiqatçılar gələcək müşahidələr vasitəsilə mümkün kosmik toqquşmadan qalan qaz izlərini araşdıraraq bu qeyri-adi qalaktikaların mənşəyini daha dəqiq müəyyənləşdirməyi planlaşdırırlar.