Cənubi Koreyanın texnologiya nəhəngi Samsung Electronics süni intellekt (AI) üçün yaddaş çiplərinə qlobal tələbatın artması fonunda əməliyyat mənfəətinin təxminən 19 dəfə yüksələcəyini açıqlayıb.

Şirkətin proqnozuna görə, aprel–iyun aylarında əməliyyat mənfəəti 89,4 trilyon von (təxminən 58,4 milyard ABŞ dolları) təşkil edib. Bu, ardıcıl üçüncü rekord rüblük nəticədir.

Cənubi Koreyada iri şirkətlər investorları əvvəlcədən məlumatlandırmaq məqsədilə ətraflı maliyyə hesabatlarını dərc etməzdən əvvəl gəlir proqnozlarını açıqlayırlar.

İyulun sonlarında tam maliyyə hesabatını təqdim edəcək Samsung bildirib ki, rüb ərzində satış həcmi 171 trilyon vona çatıb. Bu göstərici ötən ilin eyni dövrü ilə müqayisədə iki dəfədən çoxdur.

Counterpoint Research analitiki Marc Einstein bildirib ki, bu nəticələr şirkətin tarixində ən uğurlu rüblərdən biridir və ilin əvvəlində Nvidia tərəfindən qeydə alınmış rekord göstəricilərə yaxındır.

Onun sözlərinə görə, bu artım tamamilə süni intellekt bumundan qaynaqlanır. Məhdud təklif və misli görünməmiş tələbat yaddaş çipi istehsalçılarına böyük üstünlük qazandırıb.

Samsung yaddaş çiplərinin qiymətlərini də artırıb, çünki bazarda təklif hələ də tələbatı ödəmir.

Tədqiqat şirkəti IDC qeyd edib ki, məlumat mərkəzləri və digər AI infrastrukturu üçün yarımkeçiricilərə olan tələbat indiyədək görünməmiş səviyyəyə çatıb. Bu isə gündəlik elektron cihazlar üçün istifadə olunan çiplərin tədarükünə də təsir göstərir.

IDC analitiki Bryan Ma bildirib ki, AI məlumat mərkəzlərinə yüksək tələbat səbəbindən çip bazarında sıxlıq gələn il də davam edəcək.

Samsung dünyanın ən böyük yarımkeçirici istehsalçılarından biridir. Şirkət Nvidia və Google kimi nəhənglər üçün çiplər istehsal etməklə yanaşı, öz elektron məhsullarını da bazara təqdim edir.

Bununla belə, Samsung-un səhmləri Seul birjasında təxminən 7 faiz ucuzlaşıb. Səbəb isə bəzi investorların daha yüksək mənfəət gözləntiləri olub.

İlin əvvəlindən şirkətin bazar dəyəri iki dəfədən çox artıb. Onun əsas rəqibi SK Hynix isə 200 faizdən çox bahalaşıb.

Hər iki şirkətin uğurlu fəaliyyəti Cənubi Koreyanın əsas fond indeksi olan KOSPI-nin bu il 80 faizdən çox yüksəlməsinə dəstək verib.

İyun ayında Cənubi Koreya hökuməti Samsung və SK Hynix-in rəhbərlik etdiyi layihələr çərçivəsində ölkənin çip istehsalı potensialını genişləndirmək üçün ən azı 880 milyard dollarlıq investisiya planını açıqlayıb.