Çinin Weibo sosial şəbəkəsində hələ buraxılmamış Redmi K70e smartfonunun icmalı dərc olunub. Büdcə flaqmanı güclü aparat və parlaq ekranla təchiz olunacaq.

Videoya əsasən, Redmi K70e 2712 x 1220 piksel təsvir ölçüsünə, 120 Hz təzələnmə tezliyinə və 1200 nit pik parlaqlığa malik 6,67 düymlük OLED displeyinə sahib olacaq. Qeyd olunur ki, smartfon plastik çərçivə ilə çərçivələnmiş şüşə örtük alacaq. Cihazın qalınlığı 8,09 mm, çəkisi isə təxminən 198 qram olacaq.

Redmi K70e 8 meqapiksellik ultra geniş bucaqlı modul və 2 meqapiksellik makro modulla tamamlanan optik sabitləşmə (OIS) dəstəyi ilə 64 meqapiksellik əsas kameradan istifadə edəcək. Ön tərəfdə 16 meqapiksellik selfi kamerası olacaq.

Smartfonun performansını yeni MediaTek Dimensity 8300 çipi, 16 GB LPDDR5X operativ yaddaş və 1 TB-a qədər daxili UFS 4.0 yaddaşı idarə edəcək. 5500 mAh batareya 90 Vt sürətli şarj dəstəyi təklif edə biləcək.

Azadmedia.az xəbər verir ki, şayiələrə görə, Redmi K70e qlobal bazarda Poco F6 5G adı ilə satışa çıxarılacaq.