İçərişəhərin qədim divarları arasında yeni bir mədəniyyət ocağı – Azərbaycan Miniatür Sənət Muzeyi fəaliyyətə başlayıb. XIV əsrə aid Molla Əhməd məscidi bərpadan sonra qədim ruhunu qorumaqla yanaşı, müasir təqdimat forması ilə də ziyarətçilərə yeni nəfəs gətirir.

Bu tarixi məkanda miniatürlər danışır, rənglər susaraq hekayə söyləyir, zaman isə xətlərin içində dayanır.

Hazırda muzeydə bir neçə gün ərzində özbək ustası Cahangir Aşurovun “Canlanmış miniatürlər” adlı unikal elektron sərgisi nümayiş olunur. Rəssamın əsərləri klassik Şərq miniatür ənənələrini müasir texnologiya ilə birləşdirərək tamaşaçılara fərqli vizual təcrübə bəxş edir.

Sərgi İçərişəhərdə, M. A. Sabir küçəsində yerləşən Molla Əhməd məscidində keçirilir. Ziyarətçilər burada qədim sənətin rəng, işıq və hərəkət harmoniyasını bir arada hiss edə bilirlər.

Bu, həm Azərbaycan, həm də region üçün qədim miniatür sənətinin yenidən doğuluşunu simvolizə edən ecazkar bir təcrübədir.