Gəncə Dövlət Milli Dram Teatrı növbəti yaradıcılıq uğuruna imza atıb. Teatrda Azərbaycan dramaturgiyasının görkəmli nümayəndəsi Cəfər Cabbarlının “Aydın” əsəri əsasında hazırlanmış tamaşanın təntənəli premyerası keçirilib. Tamaşa həm sənətsevərlər, həm də teatr ictimaiyyəti tərəfindən böyük maraqla qarşılanıb.

Quruluşçu rejissor kimi əməkdar incəsənət xadimi Əsgər Əsgərov çıxış edib. Tamaşanın musiqisi əməkdar incəsənət xadimi Cavanşir Quliyev tərəfindən bəstələnib, səhnə tərtibatı isə rəssam Mirzə Mehdi tərəfindən həyata keçirilib. Yaradıcı heyətin səmərəli əməkdaşlığı nəticəsində Cabbarlının əbədi obrazı yeni bir bədii təcəssüm qazanıb.

Tamaşada teatrın güclü aktyorlar nəsli təmsil olunub. Xalq artisti Pərvanə Qurbanova və əməkdar artist Elxan Abbasov baş rollarda izləyicilərlə görüşüblər. Bunlarla yanaşı, Murad Meyfaliyev, Günay Cabbarova, Fərid Vəliyev, Yusif Cəfərov, Mətləb Təhmazi, Elmir Məmmədov, Emil Salmanov, Akif Səfərov, Elnur Abbasov, Zaur Əhmədov, Elvin Alnağiyev və Seymur Məmmədov də tamaşada uğurla çıxış ediblər.

Qeyd edək ki, “Aydın” əsəri Azərbaycan səhnə sənətinin klassik incilərindən biri hesab olunur və hər yeni quruluşu milli teatr həyatında mühüm hadisəyə çevrilir.