Qazaxıstanda Azərbaycan əsilli reper Nəvai Bəkirovun (“Navai”) barəsində açılmış cinayət işinə xitam verilib və o, azadlığa buraxılıb.

“Mash” “Telegram” kanalının Qazaxıstanın Jambıl Vilayət Məhkəməsinə istinadən yaydığı məlumata görə, reper təqsirini etiraf edib. Onun əməlindən peşman olması və qanun pozuntusunu ilk dəfə törətməsi nəzərə alınaraq cinayət işinə xitam verilib.

Məlumata əsasən, “Navai” artıq Qazaxıstanı tərk edib. Ona beş il müddətinə ölkəyə giriş qadağası qoyulub. Reperin bu gün səhər Moskvaya çatdığı bildirilir.

Qeyd edək ki, oktyabrın 14-də Qazaxıstanın “Korday” sərhəd-keçid məntəqəsində aparılan yoxlama zamanı reperin avtomobilində narkotik maddə aşkarlanıb. Bununla əlaqədar qadağan olunmuş maddələrin qaçaqmalçılığına cəhd ittihamı ilə cinayət işi başlanıb. Onunla birlikdə avtomobildə olan daha iki nəfər də saxlanılıb.