Məşhur Məmmədov
Milli Məclisin deputatı


14 iyul 1969-cu il Azərbaycan tarixində yeni mərhələnin başlanğıcı kimi yadda qalıb. Həmin gün Ulu Öndər Heydər Əliyevin Azərbaycan rəhbərliyinə gəlməsi ilə respublikanın ictimai-siyasi, sosial-iqtisadi və mədəni həyatında köklü dəyişikliklərə yol açan inkişaf strategiyasının əsası qoyuldu. Bu tarix Azərbaycanın gələcək taleyini müəyyən edən mühüm dönüş nöqtəsi idi.

1969-cu ildən etibarən həyata keçirilən məqsədyönlü siyasət nəticəsində Azərbaycan Sovet İttifaqının geridə qalmış respublikalarından birindən ən sürətlə inkişaf edən bölgələrindən birinə çevrildi. Sənaye müəssisələri yaradıldı, kənd təsərrüfatının modernləşdirilməsi istiqamətində mühüm addımlar atıldı, infrastruktur genişləndirildi, yeni yollar, yaşayış massivləri, məktəblər, xəstəxanalar və mədəniyyət ocaqları tikildi. Respublikada iqtisadi potensialın gücləndirilməsi gələcək müstəqil Azərbaycanın iqtisadi dayaqlarını formalaşdırdı.

Ulu Öndər Heydər Əliyevin həyata keçirdiyi milli kadr siyasəti isə həmin dövrün ən mühüm strateji qərarlarından biri idi. Minlərlə azərbaycanlı gəncin SSRİ-nin nüfuzlu ali məktəblərinə göndərilməsi, onların müxtəlif sahələr üzrə peşəkar mütəxəssis kimi hazırlanması gələcək dövlət idarəçiliyi üçün güclü insan kapitalı yaratdı. Müstəqillik dövründə Azərbaycanın idarəetmə sistemində, elmində, iqtisadiyyatında və təhlükəsizlik sahəsində çalışan bir çox peşəkar məhz həmin siyasətin nəticəsində yetişmiş kadrlar idi.

Elm və təhsil sahəsində də böyük inkişaf müşahidə olundu. Yeni ali təhsil müəssisələri, elmi-tədqiqat institutları yaradıldı, məktəblərin maddi-texniki bazası gücləndirildi. Azərbaycan ziyalılarının formalaşması, milli intellektual potensialın artırılması dövlət siyasətinin əsas istiqamətlərindən birinə çevrildi.

Mədəniyyət və incəsənətin inkişafına göstərilən xüsusi diqqət Azərbaycanın milli kimliyinin qorunmasına və dünyada tanıdılmasına mühüm töhfə verdi. Tarixi abidələrin bərpası, milli musiqinin, teatrın, ədəbiyyatın və incəsənətin inkişafı istiqamətində görülən işlər xalqın milli özünüdərkinin möhkəmlənməsinə xidmət etdi.

Ulu öndər Heydər Əliyevin rəhbərliyi dövründə Azərbaycanın iqtisadi və sənaye potensialının gücləndirilməsi sonradan ölkənin enerji strategiyasının formalaşmasına da ciddi zəmin yaratdı. Hələ Sovet dövründə yaradılmış istehsal bazası, sənaye infrastrukturu və peşəkar kadr potensialı müstəqillik illərində həyata keçirilən böyük iqtisadi layihələrin uğurunda mühüm rol oynadı.

1993-cü ildə xalqın təkidli tələbi ilə siyasi hakimiyyətə qayıdan Ulu Öndər məhz 1969-cu ildən formalaşdırdığı dövlətçilik təcrübəsinə əsaslanaraq Azərbaycanı ağır böhrandan çıxardı. Dövlət müstəqilliyi qorundu, ictimai-siyasi sabitlik bərpa edildi, hüquqi dövlət quruculuğunun təməli qoyuldu və ölkənin uzunmüddətli inkişaf strategiyası müəyyən edildi.

Bu gün Prezident İlham Əliyevin rəhbərliyi ilə Azərbaycan həmin siyasi kursu uğurla davam etdirir. Son illərdə ölkəmizin qazandığı tarixi Zəfər, ərazi bütövlüyünün və suverenliyinin tam bərpası, Qarabağ və Şərqi Zəngəzurda həyata keçirilən genişmiqyaslı bərpa-quruculuq işləri, iqtisadi inkişaf və beynəlxalq nüfuzun artması Heydər Əliyev siyasi irsinin müasir dövrdə uğurla yaşadığını təsdiqləyir.

14 iyul 1969-cu il yalnız keçmişə aid tarixi hadisə deyil. Bu tarix Azərbaycanın dövlətçilik salnaməsində müasir inkişaf modelinin başlanğıcı, milli intibahın təməli və gələcəyə hesablanmış strateji baxışın rəmzidir. Həmin gün əsası qoyulan inkişaf fəlsəfəsi bu gün də Azərbaycanın siyasi sabitliyinin, iqtisadi qüdrətinin və beynəlxalq nüfuzunun əsas sütunlarından biri olaraq qalır.