ABŞ-ın vitse-prezidenti Kamala Harris seçki kampaniyasına başlayarkən TikTok səhifəsi açıb. Siyasətçi artıq sosial şəbəkələrdə ilk videosunu yayımlayıb.
"Eşitdim ki, son vaxtlar platformanın tövsiyələrində görünürəm, ona görə də burada özüm qeydiyyatdan keçməyi düşündüm" Harris hesab yaratmaq qərarını izah edib.
Vitse-prezident ilk videosunu iyulun 25-i axşam yayımladı. 11 saat ərzində videoya 4,9 milyon baxış, 1,2 milyon bəyənmə və 71 mindən çox şərh gəlib.
Bundan əvvəl Kamala Harris qarşıdan gələn prezident seçkilərində iştirak edəcəyini rəsmən bəyan edib. Seçki kampaniyasının ilk günündə vitse-prezident rəqibi Donald Trampı cinayətkar adlandırıb. Tramp, öz növbəsində, Harris seçkilərdə qalib gələrsə, Birləşmiş Ştatların məhv olacağını proqnozlaşdırmışdı.
İyulun 21-də hazırkı Amerika lideri Co Bayden prezidentlik yarışını tərk etdiyini açıqladı. O, ABŞ-ın hazırkı vitse-prezidenti Kamala Harrisin Demokratlar Partiyasından namizəd kimi irəli sürülməsi ideyasını dəstəkləyib. Amerika lideri vurğulayıb ki, o, istefa verməyəcək və prezidentlik müddəti başa çatana qədər diqqətini dövlət başçısının vəzifələrinə yönəldəcək.