Prezidentliyə namizəd Donald Tramp beynəlxalq ticarətdə ABŞ dollarından istifadə etməkdən imtina edən ölkələrin mallarına 100 faizlik rüsum tətbiq etmək niyyətində olduğunu bəyan edib, Azadmedia.az The Economic Times-a istinadən xəbər verir ki, Donald Tramp şənbə günü Viskonsin ştatında çıxışı zamanı ABŞ dollarının “ciddi problem içində” olduğunu və onun dünyanın ehtiyat valyutası statusunu qoruyub saxlamaq niyyətində olduğunu qeyd edərək, bu bəyanatla çıxış edib.

Bu təklif Donald Trampın Çin, Hindistan və digər ölkələrin ticarətlərini dollarsızlaşdırmaq səylərinə qarşı yönəlmiş daha geniş strategiyasının bir hissəsidir.

"Əgər dollardan imtina etsəniz, ABŞ-la iş görməyəcəksiniz, çünki biz sizin mallarınıza 100 faiz rüsum tətbiq edəcəyik", - Donald Tramp deyib.

Bloomberg News xəbər verir ki, Donald Tramp və onun iqtisadi müşavirləri dollarla ticarət aparmayan ölkələrə münasibətdə cəza tədbirlərinin görülməsi ilə bağlı müzakirələr aparıblar. Bunlara ixrac nəzarəti, valyuta manipulyasiyası ittihamları və tariflər daxildir.