Birləşmiş Millətlər Təşkilatı (BMT) ABŞ prezidenti Donald Tramp və Rusiya lideri Vladimir Putin arasında danışıqların mümkünlüyünü dəstəkləyir. Bu barədə TASS BMT baş katibinin ofisinə istinadən məlumat yayıb.

Beynəlxalq təşkilat qeyd edib ki, onlar Moskva və Vaşinqton arasında dialoq üçün səylərin davam etdiriləcəyinə ümid edirlər.

Bir gün əvvəl Tramp Ukraynadakı silahlı münaqişəyə son qoymaq üçün Putinlə “dərhal” görüşmək istədiyini bildirmişdi. ABŞ prezidenti qeyd edib ki, Kiyev artıq sülh sazişi bağlamağa hazırdır və dialoqdan imtina edəcəyi təqdirdə Moskva yeni sanksiyalarla üzləşə bilər.

Vladimir Putin jurnalist Pavel Zarubinə müsahibəsində bildirib ki, o, Ukrayna münaqişəsinin həlli məsələsini və bir sıra digər mövzuları müzakirə etmək üçün Donald Trampla görüşməyə hazırdır. Dövlət başçısının sözlərinə görə, Rusiya hər zaman birgə işə açıqdır və Rusiya-Amerika münasibətləri təkcə ABŞ-ın keçmiş prezidenti Co Bayden administrasiyasının dialoqa getmək istəməməsi səbəbindən ən yaxşı dövrlərdən keçmir.