Dövlət katibi Marko Rubionun təşəbbüsü ilə həyata keçirilən optimallaşdırma proqramı çərçivəsində ABŞ Dövlət Departamenti Rusiya və Ukraynada bir sıra aparıcı və yüksək səviyyəli mütəxəssisləri işdən çıxarıb. Bu barədə “The New York Times” (NYT) mənbəyə istinadən məlumat yayıb.

Nəşrin məlumatına görə, ötən həftə işdən çıxarılan təxminən 1350 işçi arasında Kəşfiyyat Bürosunun baş analitikləri, o cümlədən Rusiya və Ukrayna mütəxəssisləri var.

Nəşrin mənbələri iddia edir ki, ixtisarlar departament tərəfindən dəyərli təcrübənin itirilməsinə gətirib çıxara bilər ki, bu da Ukrayna münaqişəsinin həlli prosesində ABŞ prezidenti Donald Trampın administrasiyası üçün faydalı ola bilər.

İyulun 11-də Associated Press agentliyi xəbər verib ki, ABŞ Dövlət Departamenti ABŞ prezidenti Donald Trampın departamentin genişmiqyaslı yenidən təşkili planı çərçivəsində 1300-dən çox diplomat və məmuru işdən çıxarır.

Qeyd olunur ki, diplomatik xidmətin bütün işdən çıxarılan əməkdaşları 120 gün müddətinə inzibati məzuniyyətə göndəriləcək, bundan sonra onlar rəsmən işini itirəcəklər. Eyni zamanda, onların əksəriyyəti üçün bu müddət cəmi 60 gün olacaq.

Kütləvi ixtisardan sonra Tramp və Rubionu bu təşəbbüsə görə indiki və keçmiş diplomatlar kəskin tənqid ediblər. Onların fikrincə, Dövlət Departamentinin ixtisarı xaricdə mövcud və yaranan təhlükələr qarşısında ABŞ-ın təsirini zəiflədəcək.