BMT-nin baş katibi Antonio Quterreş “Avaza” milli turizm zonasında keçirilən BMT-nin dənizə çıxışı olmayan inkişaf etməkdə olan ölkələr üzrə Üçüncü Konfransında iştirak etmək üçün Türkmənistana gəlib.
Türkmənbaşı şəhərinin Beynəlxalq Hava Limanında onu Türkmən xalqının Ümummilli Lideri, Türkmənistan Xalq Şurasının sədri Qurbanqulu Berdiməhəmmədov qarşılayıb.

BMT-nin baş katibi Antonio Quterreş ahəngdar inkişaf yolu ilə Türkmənistanda keçirilən humanitar əhəmiyyətli beynəlxalq forumda iştirak etməyin onun üçün böyük şərəf olduğunu bildirib.

Öz növbəsində Qurbanqulu Berdiməhəmmədov bildirib ki, BMT-nin himayəsi altında yüksək səviyyəli konfransın təşkili və keçirilməsi Türkmənistana göstərilən universal etimad kimi dəyərləndirilir.

Türkmənistana səfər çərçivəsində BMT baş katibinin prezident Serdar Berdiməhəmmədov ilə rəsmi görüşü keçiriləcək, burada qarşılıqlı maraq doğuran ikitərəfli və beynəlxalq əməkdaşlıq məsələləri müzakirə olunacaq.

BMT-nin baş katibi Antonio Quterreşin türkmən xalqının ümummilli lideri, Xalq Şurasının sədri Qurbanqulu Berdiməhəmmədovla görüşü də nəzərdə tutulub. 

Avqustun 5-dən 8-dək BMT-nin dənizə çıxışı olmayan inkişaf etməkdə olan ölkələr üzrə Üçüncü Konfransı keçiriləcək.Konfransda bir çox dövlətlərin başçıları, eləcə də beynəlxalq təşkilatların rəhbərləri və nümayəndələri iştirak edəcəklər. Antonio Quterreşin bu konfransda iştirakı onun beynəlxalq əhəmiyyətini artırır və tədbirin iştirakçısı olan dövlətlər arasında etimad əməkdaşlığının möhkəmlənməsinə töhfə verəcək.

Bildirilir ki, konfrans dənizə çıxışı olmayan inkişaf etməkdə olan ölkələrin iqtisadi potensialının artırılmasına, ticarət-iqtisadi sahədə regionlararası və beynəlxalq əlaqələrin inkişafına töhfə verəcək. 

Bundan əvvəl prezident Kasım-Jomart Tokayev və baş katib Antonio Quterreş BMT-nin Almatıdakı regional mərkəzinə səfər ediblər.