Litva Belarusla sərhəddə uçuş məhdudiyyətlərini dekabr ayına qədər uzadıb

Litva Belarusla sərhəddə hava məkanının qismən bağlanmasını 2025-ci ilin dekabr ayına qədər uzadıb. Bu barədə TASS Baltikyanı respublikanın ordu komandanlığına istinadən xəbər verir.

Qeyd olunur ki, belə bir qərar təhlükəsizlik vəziyyəti və mülki aviasiya üçün sərhədin pilotsuz uçuş aparatları tərəfindən pozulması ilə bağlı mümkün risklər nəzərə alınaraq qəbul edilib.

Eyni zamanda, Litva tərəfi kritik vəziyyətdə hava məkanının bağlanması prosedurunu sadələşdirməli olan sənədlərin hazırlanmasını 2025-ci ilin sonunadək başa çatdırmaq niyyətindədir.

Avqustun 21-də Litva Belarusla sərhəddə uçuşa qadağa zonası tətbiq edib və iddialara görə dronların fəaliyyəti və Rusiya və Belarusun “Zapad-2025” təlimlərinin başlaması səbəbindən təhlükəsizliyi əlavə gücləndirib. “Zapad-2025” Belarus-Rusiya strateji təlimlərinin praktiki mərhələsi sentyabrın 12-dən 16-dək Rusiya və Belarusun poliqonlarında baş tutub.

İyulun 28-də LRT portalı Belarus ərazisindən uçduğu iddia edilən Vilnüsdən bir qədər aralıda səmada pilotsuz uçuş aparatının göründüyünü bildirib.