Ukrayna Qərbdən olan havadarlarına ən azı uğur nümayiş etdirmək üçün Rusiya ərazisindəki dinc obyektlərə zərbələr endirir. TASS xəbər verir ki, bunu dövlət başçısı Vladimir Putin deyib.

Rusiya prezidenti qeyd edib ki, müqavimət cəhdlərinə baxmayaraq, Ukrayna Silahlı Qüvvələri bütün döyüş təmas xətti boyunca geri çəkilir.

"Və bunun fonunda Kiyev rejimi Qərb sponsorlarına ən azı uğur nümayiş etdirməyə çalışaraq, tamamilə dinc obyektlərə qarşı Rusiya ərazisinə dərin zərbələr endirməyə çalışır. Bu, ona kömək etməyəcək", - Putin bildirib.

O, əsas vəzifənin rusların, eləcə də strateji obyektlərin, o cümlədən enerji infrastrukturunun təhlükəsizliyini təmin etmək olduğunu vurğulayıb.

Bundan əvvəl Vladimir Putin Amerikanın uzaqmənzilli “Tomaqavk” raketlərinin potensial olaraq Ukraynaya ötürülməsinin Rusiya ilə ABŞ arasında münasibətlərə mənfi təsir edəcəyini qeyd edib. Eyni zamanda, o, belə raketlərin zərər verə biləcəyini, lakin Rusiya hava hücumundan müdafiə sisteminin “onları vuracağını” etiraf edib.