2026-cı ilin yayında layihəyə əsasən, Xəzər dənizinin dibində Azərbaycan və Qazaxıstanı birləşdirəcək fiber-optik kabelin çəkilməsi işlərinə başlanılacaq. Kabelin istehsalına artıq başlanılıb, deyə Azərbaycan rəsmisi bildirib.

Telekommunikasiyanın İnkişafı üzrə Ümumdünya Konfransında (WTDC-25) Azərbaycan Respublikasının Rəqəmsal İnkişaf və Nəqliyyat nazirinin müavini Səmədəddin Əsədov bildirib ki, Qazaxıstandan Azərbaycana Xəzər dənizi vasitəsilə fiber-optik kabel çəkmək layihəsinin həyata keçirilməsinə 2026-cı ilin yayında başlanacaq.

2026-cı ilin sonuna qədər işlərin tam başa çatdırılması və kabelin sonradan istismara verilməsi planlaşdırılır. Nazir müavini bildirib ki, hazırda kabelin özünün istehsalına artıq başlanılıb.

Əsədovun sözlərinə görə, yeni rabitə xətti Azərbaycanın regionda, o cümlədən süni intellekt sahəsində rəqəmsal texnologiyalar mərkəzi kimi mövqeyinin möhkəmləndirilməsində əsas amil olacaq.