Fransa hökumətinə qarşı bir gün ərzində ikinci dəfə etimadsızlıq votumu irəli sürülüb. Bu dəfə təşəbbüslə solçu La France insoumise (“Təslim Olmayan Fransa”) partiyası çıxış edib. Bu barədə partiya X sosial şəbəkəsindəki hesabında məlumat yayıb.
Bəyanatda bildirilir ki, partiya 2035-ci ilə qədər nəzərdə tutulan və parlamentdə əvvəlcədən müzakirə və səsvermə olmadan təsdiqlənmiş enerji strategiyasından narazı olduğu üçün hökumətin istefasını tələb edir. Partiyanın fikrincə, bu yanaşma konkret şəxslərin qərarlarını bütün Fransaya zorla qəbul etdirmək cəhdidir və həmin qərarlar təxminən daha 10 il qüvvədə qalacaq, cəmiyyətin müzakirə hüququ isə nəzərə alınmayıb.
“Təslim Olmayan Fransa” vurğulayıb ki, enerji strategiyası dövlətin uzunmüddətli inkişafını müəyyən edən ən mühüm sənədlərdən biridir və buna görə də o, qanunvericiliklə müəyyən edilmiş parlament prosedurlarından kənar qəbul edilə bilməz.
Bu gün hökumətə qarşı ilk etimadsızlıq votumu isə sağçı Rassemblement National (“Milli Birlik”) partiyası tərəfindən irəli sürülüb. Partiyanın lideri Marine Le Pen-dir. Onların bəyanatında qeyd olunub ki, Nazirlər Kabinetinin qəbul etdiyi enerji strategiyası digər iradlarla yanaşı, vergilərin və ya kommunal xidmət haqlarının artmasına səbəb ola bilər və bu da fransızlara 300 milyard avrodan çox başa gələ bilər.