İranda son 24 saat ərzində hücumların intensivliyi kəskin şəkildə artıb. İnsan Haqları Fəalları Agentliyinin (HRANA) yaydığı məlumata görə, 27 mart 2026-cı il saat 17:00-a olan vəziyyətə əsasən, ölkənin 18 vilayətində baş verən 164 hadisə çərçivəsində azı 541 hücum qeydə alınıb.
Hesabata əsasən, bu hücumlar nəticəsində ümumilikdə azı 171 nəfər həlak olub və ya yaralanıb. Bu göstərici son bir həftə ərzində qeydə alınan ən yüksək rəqəm kimi qiymətləndirilir. Bildirilir ki, eyni gün ərzində İranın polad sənayesi və onunla əlaqəli iki elektrik stansiyası genişmiqyaslı hücum və dağıntılara məruz qalıb.
HRANA-nın təsdiqlədiyi məlumatlara görə, gün ərzində azı 35 mülki şəxs həyatını itirib, 60 nəfər isə yaralanıb.
Münaqişənin 28 fevral 2026-cı il tarixindən bu yana ümumi statistikasına nəzər saldıqda, itkilərin miqyası daha da aydın görünür. Belə ki, bu müddət ərzində azı 1 527 mülki şəxs (onlardan ən azı 228-i uşaqdır), 1 167 hərbçi və statusu dəqiqləşdirilməmiş 695 nəfər həlak olub.
Rəsmi qurumların açıqlamalarında da ciddi itkilər qeyd olunur. Qızıl Aypara Cəmiyyəti bildirib ki, 92 mindən çox mülki obyekt zərər görüb və 1 621 uşaq yaralanıb. Təcili Tibbi Yardım Xidmətinin rəhbəri isə müharibə dövründə 18 yaşdan aşağı 200-dən çox şəxsin və 237 qadının öldüyünü açıqlayıb.
İsfahan vilayətinin qubernatoru da son hücumlar nəticəsində bölgənin müxtəlif ərazilərində 25 işçinin həlak olduğunu, onlardan birinin erməni və xristian icmasına mənsub olduğunu qeyd edib.