Məlumatlı bir mənbə Tasnim News Agency-yə açıqlamasında bildirib ki, ABŞ tərəfindən yaxın zamanda Tehrana göndərilən mətnə baxmayaraq, İran “müharibənin dayandırılması və İran xalqının hüquqlarının təmin olunması” məsələsində prinsipial mövqeyindən geri çəkilməyəcək.

Mənbənin sözlərinə görə, İranın dondurulmuş maliyyə vəsaitləri şəffaf və qəti şəkildə İran xalqına qaytarılmalıdır və yalnız kağız üzərində verilən vədlərin heç bir faydası yoxdur.

“Bəzi vədlərə baxmayaraq, (İrana məxsus) dondurulmuş vəsaitlərin geri qaytarılması ilə bağlı fikir ayrılığı qalır,” – deyə mənbə vurğulayıb.

Məlumatlı şəxs həmçinin bildirib ki, İran ABŞ-ın ölkəyə qarşı hərbi təcavüzünə görə kompensasiya tələb etməkdə ciddi mövqe nümayiş etdirir. O əlavə edib ki, ABŞ tərəfinin “İnkişaf və Yenidənqurma Fondu”nun yaradılması ilə bağlı bəzi təkliflərindən danışmasına baxmayaraq, həmin təkliflər həm məbləğ, həm də digər məsələlər baxımından İranın tələblərindən uzaqdır.