Yaxın Şərq ölkələri İranın Fars körfəzi və Hörmüz boğazı sularını idarə etmək cəhdlərinə qarşı çıxaraq, Tehranın gəmiçilik idarəçiliyi üçün yaratdığı yeni qurumu və təklif etdiyi yük tranziti marşrutunu rədd ediblər.

Fars körfəzi ölkələri – BƏƏ, Bəhreyn, Küveyt, Qətər və Səudiyyə Ərəbistanı – Tehranın Hörmüz boğazında gəmiçiliklə bağlı öz şərtlərini qəbul etdirmək cəhdlərinə etiraz ediblər. Ölkələr bu mövqeni Dəniz Təhlükəsizliyi Komitəsinin sessiyası çərçivəsində imzalanmış birgə bəyanatda bildiriblər.

Xüsusilə, ölkələr İranın yeni yaratdığı “Fars Körfəzi İşləri İdarəsi” adlı quruma qarşı çıxıblar. Bəyanatı imzalayan dövlətlər İranın Hörmüz boğazı və Fars körfəzi sularına nəzarət etmək səlahiyyətinə malik olub-olmadığını şübhə altına alıblar.

Bundan əlavə, Yaxın Şərq monarxiyaları Tehran tərəfindən təklif edilən alternativ gəmi marşrutunu da rədd ediblər.

Bundan əvvəl İran İslam Respublikası “Fars Körfəzi İşləri İdarəsi”ni təsis etmiş və onun məsuliyyət zonasını göstərən xəritə yayımlamışdı. Həmin zona şərqdə İranın Kuh-Mobarak bölgəsi və Əl-Fuceyra əmirliyindən başlayaraq, qərbdə Keşm adası və Umm əl-Kayveyn əmirliyinə qədər olan Hörmüz boğazı hissəsini əhatə edir.