Polşanın xarici işlər naziri Radoslav Sikorski bəyan edib ki, Ukraynanın Avropa İttifaqına inteqrasiyası keçmişdə baş vermiş qanlı hadisələrin təkrarlanmaması baxımından mühüm əhəmiyyət daşıyır.

Onun sözlərinə görə, Avropa inteqrasiyası 1950-ci illərdə bir-biri ilə müharibə aparmış dövlətlər arasında sülh və əməkdaşlıq yaratmaq məqsədilə başlayıb. Sikorski bildirib ki, Avropa liderləri keçmiş düşmənləri eyni platformada birləşdirərək yeni müharibələrin qarşısını almağa nail olublar.

“Avropa inteqrasiyası sülh prosesidir. Məqsəd keçmişdə yaşanmış qırğınların bir daha təkrarlanmamasıdır”, – deyə o vurğulayıb.

Bununla yanaşı, son aylarda Varşava ilə Kiyev arasında münasibətlər gərgin olaraq qalır. Buna səbəb tarixi yaddaş və xüsusilə Volın faciəsi ilə bağlı fikir ayrılıqlarıdır. Polşa rəhbərliyi dəfələrlə bəyan edib ki, Ukraynanın Aİ-yə üzvlüyü yolunda Varşavanın dəstəyi müəyyən şərtlərin yerinə yetirilməsindən asılı olacaq.

Polşa Prezidenti Karol Navrotski də əvvəllər Ukraynanın Avropa İttifaqına üzvlüyünün Polşanın kənd təsərrüfatı sektoruna risk yarada biləcəyini bildirmişdi. Eks-prezident və siyasətçilər arasında da Ukraynanın Aİ-yə qəbulunun Polşa daxilində Avropa İttifaqına münasibətə təsir göstərə biləcəyi barədə fikirlər səsləndirilib.