Ermənistan Rusiya ilə dəmir yollarının mənsubiyyəti məsələsində “münaqişəyə girmək” istəmir. Bunu Ermənistanın baş naziri Nikol Paşinyan bildirib.

Paşinyan media nümayəndələri ilə brifinq zamanı Ermənistan və Rusiya arasında Cənubi Qafqaz Dəmir Yollarının (CƏQD) konsessiyasının ötürülməsi ilə bağlı müxtəlif variantların müzakirə edildiyini deyib.

“Dəmir yolu ilə bağlı vəziyyətə gəlincə, biz məsələni dostcasına həll etmək istəyirik, yəni hər hansı kəskin qərarlara getmək istəmirik”, – Paşinyan qeyd edib.

Onun sözlərinə görə, konsessiya müqaviləsinin Rusiya ilə ləğvi Ermənistan üçün qəbuledilməzdir, çünki bu, qeyri-dost addım olardı.

Paşinyan mümkün variantlardan birinin şirkətin müəyyən hissəsinin satılması olduğunu bildirib. Bu halda Rusiyanın CƏQD-də minoritar səhmdar kimi qalması nəzərdə tutulur.

Digər variant isə infrastrukturun idarə olunması və sərnişin-yük daşımaları üzrə lisenziyaların tərəflər arasında bölüşdürülməsidir. Baş nazirin sözlərinə görə, bu modeldə funksiyalar Ermənistan və Rusiya arasında bərabər şəkildə bölünə bilər.

Məsələ Azərbaycanın regiondakı nəqliyyat kommunikasiyaları, xüsusilə də Ermənistan ərazisindən keçəcək mümkün regional nəqliyyat marşrutları baxımından əhəmiyyət daşıyır. Ermənistanın dəmir yolu infrastrukturunun idarə edilməsində Rusiya ilə münasibətləri və mümkün dəyişikliklər gələcək regional nəqliyyat bağlantılarının formalaşmasına da təsir göstərə bilər.