Hüquqşünas qanundakı mümkün tədbirləri açıqladı

Ramiz Mehdiyevin oktyabrın 5-də keçiriləcək məhkəmə iclasında iştirak edib-etməyəcəyi məlum deyil.

Sentyabrın 21-də Bakı Ağır Cinayətlər Məhkəməsində onun və sabiq köməkçisi Eldar Əmirovun cinayət işi üzrə hazırlıq iclası keçirilib. Ramiz Mehdiyev səhhəti ilə bağlı səbəbdən iclasda iştirak etməyib.

İş məhkəmə baxışına verilib. Növbəti iclas hakim Murad Aslanovun sədrliyi ilə oktyabrın 5-də keçiriləcək.

Modern.az-a açıqlamasında hüquqşünas Əliməmməd Nuriyev bildirib ki, Cinayət-Prosessual Məcəllənin 311.1-ci maddəsinə əsasən, təqsirləndirilən şəxs məhkəmə baxışının bütün iclaslarında iştirak etməlidir.

Onun sözlərinə görə, şəxsin iştirakı olmadan məhkəmə baxışı yalnız müəyyən hallarda mümkündür. Təqsirləndirilən şəxsin ölkə hüdudlarından kənarda olması və məhkəməyə gəlməkdən qəsdən boyun qaçırması belə hallardan biridir.

Ə.Nuriyev bildirib ki, səhhət vəziyyəti məhkəməyə gəlməyə əsaslı maneə yaradırsa, bu hal üzrlü səbəb kimi qiymətləndirilə və iclas təxirə salına bilər.

Üzrlü səbəb olmadan məhkəməyə gəlmədiyi halda isə təqsirləndirilən şəxsin məcburi gətirilməsi barədə qərar qəbul edilə bilər. Qanunda nəzərdə tutulan əsaslar olduqda qətimkan tədbirinin seçilməsi və ya daha ağır tədbirlə əvəz edilməsi də mümkündür.

Hüquqşünas vurğulayıb ki, məhkəmə iclasında iştirak etməmək avtomatik olaraq bu tədbirlərin tətbiqinə səbəb olmur. Məsələ konkret hallar nəzərə alınmaqla məhkəmə tərəfindən qiymətləndirilir.