Prezident İlham Əliyev Yeni Azərbaycan Partiyasının VIII Qurultayında çıxışı zamanı gələn il minimum əməkhaqqının, pensiyaların və sosial müavinətlərin artırılacağını açıqlayıb. Dövlət başçısı bununla bağlı müvafiq göstərişin verildiyini bildirib.

Bu açıqlama 2027-ci ilin əvvəlində yeni sosial paketin reallaşdırılacağına dair mühüm mesaj kimi qiymətləndirilə bilər. Xüsusilə minimum əməkhaqqının artırılması məsələsinin artıq sosial siyasətin mütəmadi istiqamətlərindən birinə çevrilməsi diqqət çəkir.

Əmək qanunvericiliyinə edilmiş son dəyişikliklərə əsasən, Azərbaycanda minimum əməkhaqqı məbləğinə ildə azı bir dəfə yenidən baxılması nəzərdə tutulur. Bu baxımdan 2027-ci ilin əvvəlində minimum əməkhaqqının artırılması ilə bağlı qərarın qəbul ediləcəyi gözlənilir.

Yeni sosial paketin digər mühüm istiqaməti pensiyaların artırılması olacaq. Gələn ilin yanvarından bütün növ əmək pensiyalarının indeksləşdirilməsi nəzərdə tutulur. Bu dəyişiklik təxminən 1 milyon 100 min vətəndaşı əhatə edəcək.

Hazırkı qaydalara əsasən, əmək pensiyaları əvvəlki ildə orta aylıq əməkhaqqının artım faizinə uyğun indeksləşdirilir. Yeni müzakirə olunan dəyişikliklər isə pensiya artımında daha diferensial yanaşmanın tətbiqini və sosial sığorta haqlarına əsaslanan modelin genişləndirilməsini nəzərdə tutur. Bu yanaşmanın məqsədi pensiya təminatında ödənilən sosial haqların rolunu daha da artırmaqdır.

Sosial siyasətin miqyasını 2027-ci ilin dövlət büdcəsində bu istiqamətə ayrılması nəzərdə tutulan vəsait də göstərir. Gələn il sosial sahəyə ayrılacaq vəsaitin ümumi dövlət xərclərinin təxminən 44 faizini təşkil edəcəyi bildirilir. Bu isə 18,5 milyard manatdan artıq vəsaitin sosial istiqamətlərə yönəldilməsi deməkdir.

Beləliklə, minimum əməkhaqqı və pensiyaların artırılması, sosial müavinətlərin yüksəldilməsi və sosial sahəyə ayrılan vəsaitin genişləndirilməsi 2027-ci ildə əhalinin sosial müdafiəsinin gücləndirilməsinə yönəlmiş yeni mərhələnin əsas istiqamətləri kimi qarşıya çıxır.

Prezident İlham Əliyevin YAP-ın VIII Qurultayında verdiyi açıqlama isə bu baxımdan 2027-ci ilin yeni sosial paketinin əsas anonslarından biri kimi diqqət çəkir.