İqtisadiyyat Nazirliyinin Aparat rəhbəri Elvin Camalov 2027-ci ilin dövlət büdcəsi layihəsinin müzakirəsi zamanı ölkənin iqtisadi göstəricilərini açıqlayıb.

O, Milli Məclisin İqtisadi siyasət, sənaye və sahibkarlıq komitəsinin iclasında bildirib ki, 2026-cı il 2022–2026-cı illəri əhatə edən sosial-iqtisadi inkişaf Strategiyasının yekun ilidir. Qarşıdakı dövr isə 2027–2030-cu illəri əhatə edən yeni inkişaf mərhələsi olacaq.

E.Camalovun sözlərinə görə, strategiyanın nəticələrinə əsasən, 2022–2026-cı illərdə ÜDM-in orta illik artımının 2,7%, qeyri-neft-qaz sektorunun artımının isə 5,2% olacağı gözlənilir. Bu göstərici müəyyən edilmiş hədəfi üstələyir.

O qeyd edib ki, 2019-cu ildən etibarən qeyri-neft-qaz ixracı 2,5 dəfə artıb. 2026-cı il oktyabrın 1-nə strateji valyuta ehtiyatları 89,4 milyard dollara çatıb. Bu məbləğ illik ÜDM-dən çox, xarici dövlət borcundan isə təxminən 20 dəfə yüksəkdir.

Aparat rəhbəri əlavə edib ki, qeyri-neft-qaz sektorunun özəl sahəsində əmək müqavilələrinin sayı təxminən iki dəfə artaraq ümumi müqavilələrin 56,5%-ni təşkil edib.

Onun sözlərinə görə, qeyri-neft-qaz sənayesi, logistika və rəqəmsal xidmətlər iqtisadi artımın əsas istiqamətlərindəndir. Özəl sektorun əsas kapitala investisiyaları 14,7 milyard manat təşkil edib ki, bu da real ifadədə 10,9% artım deməkdir. Qeyri-neft-qaz sektorunda özəl investisiyaların artımı isə 21%-ə yaxın olub.

E.Camalov vurğulayıb ki, dövlət büdcəsi xərclərinin, xüsusilə əsaslı xərclərin ilin sonunadək tam icrası iqtisadi artım tempinə təsir edən mühüm amillərdəndir.