Azadmedia.az xəbər verir ki, Serbiya prezidenti Aleksandar Vuçiç parlamentin iclasında deyib ki, Kosovodakı vəziyyətin nizamlanması üçün Fransa-Almaniya strategiyasını qəbul etməsə, ölkə pariyaya çevrilə bilər. O vurğulayıb ki, indi beynəlxalq arenada təkbaşına hərəkət etmək mümkün deyil, lakin Serbiyanın Rusiyaya qarşı sanksiyalar tətbiq etməkdən imtina etməsi səbəbindən müttəfiqsiz qalıb.
Prezident bildirib ki, Belqrad Serbiyanın həyati maraqlarına təhlükə yaranana qədər hərbi neytrallıqdan əl çəkmək niyyətində deyil. Cənab Vuçiç ölkənin Avropa İttifaqına daxil olmasını Serbiya hökumətinin siyasi kursunun mühüm elementi adlandırıb.

Xatırladaq ki, Rusiyaya qarşı sanksiyalar tətbiq etməkdən imtina etməsinə baxmayaraq, Serbiya rəhbərliyi Rusiya ordusunun hərəkətlərini dəstəkləmir, Krımı və Donbası Ukraynanın bir hissəsi hesab edir və münaqişə başa çatdıqdan sonra Ukrayna şəhərlərinin bərpasına qoşulacağını vəd edir. Ölkə həmçinin ukraynalı qaçqınlara kömək üçün vəsait ayırır və Ukraynaya humanitar yardım göndərir.