Milli Kəşfiyyat Təşkilatı və Türkiyə polisi "İslam Dövləti"nin fəaliyyətində əli ola biləcək 15 nəfəri saxlayıb. Azadmedia.az xəbər verir ki, yerli media ilkin olaraq onların İsveç, Hollandiya konsulluqlarına, xristian və yəhudilərin dini yerlərinə hücum etmək göstərişi almaqda şübhəli bilindiyini bildirib. Bununla belə, hüquq-mühafizə orqanlarının məlumatına görə, terror aktları ilə bağlı planlar barədə məlumat təsdiqini tapmayıb.

“Anadolu”nun məlumatına görə, şübhəlilərin İŞİD-lə əlaqələri olub və əvvəllər “münaqişə zonalarında” olublar. Bununla belə, baş konsulluqlara qarşı konkret təhdidlər aşkarlanmayıb. Saxlanılan şəxslər məhkəməyə aparılıb.

Xatırladaq ki, noyabr ayında İstanbulun mərkəzində, İstiklal piyada küçəsində partlayış baş verib. 6 nəfər ölüb, 80-dən çox insan yaralanıb. Ankara insidentdə kürd birləşmələrini günahlandırıb. Kürdlər isə hücumda iştirakını inkar ediblər.

Yanvarın sonunda ABŞ İstanbulda terror aktları təhlükəsi ilə bağlı həmvətənlərinə xəbərdarlıq edib. Səbəb Danimarkanın ifrat sağçı Hard Deal partiyasının lideri Rasmus Paludanın Türkiyənin Stokholm və Kopenhagendəki səfirlikləri qarşısında Quran yandırmaqla həyata keçirdiyi aksiyalar olub. Böyük Britaniya, Fransa, Hollandiya, İsveçrə, Almaniya və İsveç terror təhlükəsi ilə əlaqədar İstanbuldakı konsulluqlarını bağlayıb. Ankara bu qərarı Türkiyəyə qarşı “psixoloji müharibə” adlandırıb.