İran və Ermənistan heç bir “dəhliz” yaradılmasına imkan verməyəcək. Azadmedia.az xəbər verir ki, bunu İranın Ermənistandakı səfiri Abbas Bədaşxan Zohuri ikitərəfli münasibətlərə dair konfransda deyib.

“İran və Ermənistan qonşu olub və olacaq. Əlbəttə ki, bəzi hiylələrə diqqət yetirə bilərsiniz, bəzi sözdə dəhlizlərdən danışırlar. Lakin İran və Ermənistan belə bir dəhlizin yaradılmasına imkan verməyəcək”, - deyə səfir bildirib, əlavə edib ki, kiminsə, məsələn, dəhliz yaratmaq ideyası ilə çıxış etməsini gözləməməliyik ki, sonra hansı mövqe tutacağımıza qərar verək. Biz buna imkan verməməliyik. İki ölkə təşəbbüs göstərməli, hansı yeni hərəkətlər və addımlar atmalı olduğunu müəyyən etməlidir.

İran səfiri Ermənistan Respublikasının Sünik vilayətinin Kapan şəhərində İran konsulluğunun açılmasını, eləcə də Ermənistanın Təbrizdə gözlənilən konsulluğunun açılmasını düzgün qərar adlandırıb.