Hollandiya Sankt-Peterburqdakı konsulluğunu bağlayır, Haaqadakı rus diplomatlarının sayını məhdudlaşdırır və Amsterdamdakı Rusiya ticarət nümayəndəliyini bağlayır. Xarici İşlər Nazirliyi həmçinin bildirib ki, bəzi rus diplomatları iki həftə ərzində Hollandiyanı tərk etməli olacaqlar.

“Rusiya diplomatiya pərdəsi altında kəşfiyyat agentlərini gizli şəkildə Hollandiyaya köçürməyə cəhd etməkdə davam edir. Biz bunun baş verməsinə icazə verə bilmərik və etməməliyik”, - deyə xarici işlər naziri Vopke Hoekstra bildirib.
Azasmedia.az Reuters-ə istinadla xəbər verir ki, Amsterdamdakı ticarət nümayəndəliyi hökumətin əmrinə əsasən çərşənbə axşamı bağlanacaq. Sankt-Peterburqdakı konsulluq işçi çatışmazlığı səbəbindən bazar ertəsindən müvəqqəti olaraq bağlanacaq.

Rusiya da öz növbəsində Sankt-Peterburqdakı konsulluqda və ya Moskvadakı səfirlikdə işləyəcək holland diplomatlarına viza verməkdən imtina edir, Xarici İşlər Nazirliyi bildirib. Buna cavab olaraq Rusiyanın Haaqadakı səfirliyindəki diplomatların sayının Hollandiyanın Moskvadakı səfirliyindəki diplomatların sayına uyğun olaraq məhdudlaşdırılması qərara alınıb.

“Beləliklə, bir sıra diplomatlar iki həftə ərzində ölkəni tərk etməli olacaqlar”, - nazirlik onların sayını açıqlamadan bildirib.