Cənubi Koreyanın xarici işlər naziri Pak Çin bildirib ki, Koreya Respublikası Rusiya və KXDR arasında qarşılıqlı fəaliyyətdən narahatdır. Azadmedia.az xəbər verir ki, o, bu barədə Amerikanın CNN telekanalının efirində bildirib.

"Biz Rusiya ilə Şimali Koreya arasında müxtəlif sahələrdə əməkdaşlıqdan narahatıq və Pxenyanın istənilən təxribatına hazır olmalıyıq", - nazir deyib.

O, Şimali Koreyanın nüvə silahından istifadə etməklə hədələdiyinə də diqqət çəkib.

Yaponiya Müdafiə Nazirliyi bundan əvvəl Koreya Xalq Demokratik Respublikasının (KXDR) Yaponiya dənizinə doğru iki ballistik raket atdığını bildirmişdi.

Hərbi idarənin məlumatına görə, Şimali Koreyanın buraxdığı raketlər 50 və 100 km maksimum uçuş hündürlüyündə müvafiq olaraq 350 və 400 km uçub. Agentliyin açıqlamasında raketlərin Yaponiyanın iqtisadi zonasından kənara düşdüyünə aydınlıq gətirilir. Təyyarələrə və gəmilərə ziyan dəyməsi barədə məlumat verilməyib.