Aİ Şurası Belarusa qarşı "daxili repressiya" və "Ukrayna münaqişəsində iştirakı" üçün tətbiq edilən məhdudlaşdırıcı tədbirlərin müddətini bir il uzadıb. Sanksiyalar 2024-cü il fevralın 28-dək qüvvədə olacaq.

Azadmedia.az xəbər verir ki, məhdudlaşdırıcı tədbirlərə Aİ-yə səyahət qadağası və Belarus prezidenti Aleksandr Lukaşenko da daxil olmaqla 195 nəfərin aktivlərinin dondurulması, həmçinin 34 təşkilatın aktivlərinin dondurulması daxildir. Həmçinin, Aİ-nin fiziki və hüquqi şəxslərinin siyahıya daxil olanlara birbaşa və ya dolayı yolla vəsait verməsi qadağandır. Bundan əlavə, Belarus məqsədyönlü iqtisadi sanksiyaların, o cümlədən maliyyə sektoru, ticarət, ikili təyinatlı mallar, texnologiya və telekommunikasiya, enerji, nəqliyyat və digər sahələrdə məhdudiyyətlərin təsiri altında qalır.

Qərar illik icmal əsasında, həmçinin Belarusda daxili vəziyyətin davam edən ciddiliyi və hərbi əməliyyata dəstək səbəbindən qəbul edilib.

Aİ Şurası həmçinin Belarusda vətəndaş cəmiyyətinə və müstəqil mediaya dəstəyi davam etdirməyə söz verib.

2020-ci ilin avqustunda Lukaşenkonun qalib gəldiyi prezident seçkilərinin rəsmi nəticələrinin açıqlanmasından sonra Belarusda kütləvi etirazlar başladı və 2021-ci ilin martına qədər başa çatdı. Hökümətin etirazları dağıdacağına dair xəbərlər fonunda Aİ sanksiyalar tətbiq etməyə başlayıb.

Yanvar ayında Bloomberg xəbər vermişdi ki, Aİ Belarusa qarşı ikili təyinatlı mallar, neft, kömür, polad və qızıl məhsullarına təsir edəcək yeni sanksiyalar paketi tətbiq etməyi planlaşdırır.