Türkiyə prezidenti Rəcəb Tayyib Ərdoğan ötən həftə mədə qripindən əziyyət çəkdikdən sonra özünü yaxşı hiss etdiyini bildirib. Cənab Ərdoğan seçki kampaniyasını bərpa etdiyini qeyd edib.

“Özümü olduqca yaxşı hiss edirəm. Biz mitinqlərin keçirilməsində fasilə vermədik, bütün proqramı bərpa etdik”, – Rəcəb Tayyib Ərdoğan Türkiyə telekanallarına müsahibəsində bildirib.

Azadmedia.az xatırladır ki, aprelin 25-də Rəcəb Tayyib Ərdoğan canlı yayımda müsahibə verərkən özünü pis hiss edib. Bəzi media onun infarkt keçirdiyini iddia edib. Daha sonra prezidentin nümayəndələri bunu təkzib etdilər. Cənab Ərdoğanın səhhətinin pis olmasının rəsmi səbəbi mədə soyuqlaması olub.

Rəcəb Tayyibin xəstəliyindən sonra Ərdoğan onlayn rejimdə bir sıra rəsmi tədbirlərdə iştirak edib. Aprelin 29-da Ərdoğan xəstəliyindən sonra ilk dəfə ictimaiyyət qarşısına çıxıb. Aprelin 30-da o, xəstələndikdən sonra ilk seçki mitinqini keçirib. Türkiyədə prezident seçkiləri mayın 14-də keçiriləcək.